絲絲講場：「水哥」張樹槐創業專解危機
恒生銀行（00011）前公關阿頭張樹槐（水哥），挾住於全球六大洲完成逾80個馬拉松比賽戰績，亦曾為六任恒生大班效力，似乎最終目標係以KOL身份，幫企業做吓危機管理！
涉足企業形象提升
水哥剛踏入社會由記者做起，隨後又做過科技界及教育界，最後先加入恒生傳訊及可持續發展部。絲絲就八到，水哥自從退位後，最近計劃開設顧問公司，幫企業管理危機及提升形象。
雖然佢喺金融界打滾多年，但行內好多人一提起水哥，就一定會諗起佢對長跑咁堅持，如果上網查水哥個大名，仲可以搵到好多佢嘅長跑威水史，唔知佢有冇諗過，直接將自己打造成馬拉松形象顧問呢？
余絲韻