絲絲講場：股神飯局價勢破紀錄
想把握一年一度嘅機會，同股神巴菲特鋸扒、講投資兼談心？咁要拎定荷包同吼實eBay拍賣網。第20屆巴菲特慈善午餐已經喺eBay網站開始拍賣，由美國時間周日起至本周五（五月二十六至三十一日）結束，開價2.5萬美元。
中標者可以邀請7位朋友與股神在紐約曼哈頓Smith & Wollensky餐廳共進午餐。
今年股神慈善午餐零舍有意義，除咗係第20年舉辦外，股神已經88歲，想同佢食Lunch嘅機會真係買少見少，難怪尋晚已有11個人出價競投，最高出價逾335萬美元（逾2,613萬港元）。舊年拍賣共錄得136口承價，最終以330萬美元（約2,574萬港元）拍出，為歷來第三高，略低於一二年及一六年均為345.6萬美元嘅紀錄。今年個價飆得咁快，睇嚟極有可能創造歷來拍賣成交新高紀錄！
款項捐助貧困人士
巴菲特午餐拍賣所得，會捐畀三藩市慈善機構格萊德基金會（Glide Foundation），幫助貧窮和無家可歸人士。巴菲特喺一份聲明中指出，呢筆資金可以令人見到希望，對於三藩市非常重要。
余絲韻