絲絲講場：港交所大堂日日開騷

明明周三無新股，但點解絲絲話係「新股周」？事關當日舉行嘅「香港生物科技峰會」，以資本市場與生命科學發展為主題，而港交所去年修例允許未有收入生物科技企業來港上市。呢個峰會可以畀更多人了解生科行業，又可以畀「潛在新股」了解資本市場，同新股有密切關係！

絲絲索到，峰會請咗唔少業界猛人出席，好像騰訊控股（00700）有份投資嘅內地在線醫療公司微醫聯合創始人及首席戰略官張曉春、年初先至嚟香港上市嘅基石藥業（02616）董事長及首席執行官江寧軍同埋君實生物（01877）首席執行官李寧等。

慕尚借掛牌宣傳服飾

講番新股，尋日上市嘅中國時尚男裝公司慕尚集團（01817）「打頭陣」，余勇作為集團執行董事兼首席執行官，當然唔會放棄任何一個有助集團發展嘅機會，化身成為代言人，着住集團品牌服飾參加上市儀式。

通常啲企業高管最鍾意着老西貪夠體面，但余總Young爆兼反傳統，一身Smart Causal裝扮，直條裇衫捲袖襯集團Logo T-shirt加白波鞋，啱晒集團主打時尚男裝Feel，集團高管都一樣着集團服飾出席上市儀式。

慕尚就連送畀聯交所嘅紀念品都唔放過，刻住集團發展里程碑同品牌訊息，但奇就奇在無關於集團上市嘅事。公司解釋，紀念品本身已經代表上市，唔使特別刻上去！宣傳到咁出面，港交所係時候收番廣告費！

慕尚尋日掛牌表現都叫做過得去，其招股價定價雖然下調至4.39元，但開市即高開報4.45元，最終收市報4.5元，較招股價高2.5%。未扣手續費，每手500股，散戶帳面小賺55元。

余絲韻