孖妹S檔案:蟹民自救術邊招最掂?

做得長線投資者,一般都係性格樂觀、憧憬世界會更美好嘅人。不過,最近港股被中美貿易戰陰霾籠罩,持續無起色,仲要打破「五窮六絕七翻身」嘅常態,恒指七月跌1.29%。一班長情股民淪為蟹民,成績表滿缸紅,究竟會有幾傷心?等孖妹一邊八吓,一邊同佢哋打打氣啦。

陳:散戶 陳先生  

蔡:散戶 蔡小姐

劉:散戶 劉先生

劉太:散戶 劉太

馮:散戶 馮勇皓

何:城市大學資訊管理三年級生 何進熹

林:國農證券董事總經理 林家亨

轉炒牛熊 每注廿萬元

陳:長揸係好無奈嘅事。仲要揸住二十隻股份咁多,好困擾。

Kitty:樂觀啲!雖然輸咗錢,但贏咗個精靈腦袋吖!

陳:炒股幾十年,我依家揸住廿幾隻蟹股,如易鑫集團(02858)、御泰中彩控股(00555)、盈大地產(00432)及中國軟實力(00139),多數係三、四線股份。當中蝕得最多應該係中國軟實力,喺股價一毫及兩毫分注買入,共投資超過二百幾萬元,依家只有幾仙,好傷啊!

股價倘再插 低撈溝貨

彩兒:當年點解買佢?

陳:當初買入中國軟實力,無考慮其基本面,純粹當炒。點知就跌眼鏡。有啲股我會止蝕,但目前呢廿隻蟹股嘅股價都幾低殘,暫時係焗住揸。依家我唔再炒其他正股,日日睇實呢堆股,若佢哋真係炒上,而且上到差唔多,就會睇位沽貨。但若股價再插,我會考慮低撈溝貨,希望最後蝕得無咁甘。

Kitty:溝貨好危險!會唔會係無底深潭?

彩兒:總括咁多年成績,你係賺定蝕?

陳:蝕錢居多,但都玩咗幾十年,我都就快70歲。而對上一個廿年都係全職炒股,日日都炒,生活習慣好難話改就改。再者,我啲蟹貨仲蝕緊,洗濕咗個頭,點可以唔玩?當蟹股全部返家鄉時,我就畢業喇。其實我都幾悲哀,同股票行同病相憐。股票行業務愈縮愈細,仲要捱貴租,惟有大行搬細行撐住。

Kitty:你有無從輸錢中,學到炒股妙法?

陳:依家個市勁亂,屬於政治市,我唔識睇,正股又難玩,只會愈玩愈縮,所以最近我無炒正股,專注炒牛熊證,每注都有十幾二十萬元。計番條數,買牛證易啲贏,但呢幾日例外,買熊證賺咗幾千元。

懶理蟹倉 照追入騰訊

蔡:我成手蟹貨!唔少大家耳熟能詳嘅藍籌股都有買,原本有錢賺但無沽到,依家咪坐晒艇。例如香港交易所(00388)、滙豐控股(00005)、渣打集團(02888)、中國石油股份(00857)、華潤鳳凰醫療(01515)及麗珠醫藥(01513)等。

揸多過十隻股更易輸

Kitty:喺呢個市況下,蟹民多的是!

林:講真,若你手持多過十隻股,會令你難以集中研究,最後恐怕輸多贏少,除非你係基金經理。要賺嘅,其實有四、五隻股就夠。

彩兒:你建議買邊幾隻?

林:搵防守性強嘅股,如滙控、中國電力(02380)及友邦保險(01299)等。

Kitty:蔡太,你啲蟹貨有幾多年歷史?

蔡:我喺唔同時段買。金融股係我至愛,滙控係十幾年前喺120蚊買落;而輸得甘嘅係渣打,幾年前喺220幾蚊買入;至於中金公司(03908),就半年前喺17蚊買入幾千股。

彩兒:仲有無心情睇股票?

蔡:依家日日仲睇住個市,都無嘢好驚。聽聞科網股唔多掂,但我無理,照追入騰訊控股(00700),喺356元買,如即日放都即賺,不過我又錯失機會。

一味揸內銀 食息至上

劉太:十幾年嚟,買嚟買去,都係內銀股最好,跌就由得佢,原因係就算輸價都可以賺息。若連內銀股都驚,都無咩其他股可以買。聽證券分行經理講,內銀股向上,就皆大歡喜,因為多數散戶個倉都有內銀。而內銀股佔我嘅倉逾七成。我特別鍾意買建設銀行(00939)、工商銀行(01398)及中國銀行(03988)等。

林:無錯,內銀股係派息工具,若好耐以前買落,就算股價跌,賺息都賺到笑。年紀大啲嘅股友,放七成投資喺內銀,係唔錯。若係20至30歲嘅散戶,就可以再博少少。

港交所貿戰後料回升

Kitty:劉太,你另外三成買咗啲咩?

劉太:除咗揸住內銀股蟹貨,港交所亦坐緊艇,當時喺250蚊買,喺270蚊沽咗一部分,其餘仍蝕緊。不過,我哋呢啲好友仍睇好後市,等中美貿易戰陰霾過咗,有信心港交所會返家鄉。

內險及科網股方面,我只能入市過吓癮。我曾買入科網股,但買親都輸,如喺170蚊買入騰訊,150蚊止蝕,輸逾2萬元。加上佢無息派,市盈率又高,所以唔啱我玩。至於舜宇光學科技(02382),就算我有100萬元都唔會諗。另外,我買過內險股,試過喺40幾蚊買中國人壽(02628),20幾蚊斬晒。若我有100萬元,雖然數目唔算少,但都唔夠用嚟置業,淨係畀釐印費、裝修費及經紀佣都無晒喇。

40年前入貨 蝕錢拒放

劉:我四十年前買北京控股環境集團(00154),佢前身係香港毛紡。當時以每股1蚊買入1萬股,一直揸到依家。我無理佢,淨係知蝕咗。

彩兒:好耐以前買落嘅股份,都唔知沽定揸好。

收息股穩陣 值得持有

林:可以睇每日成交量。若成交少,相信基金都走晒貨,再揸落去都應該係輸。若成交量大,就可以再等等。另外,計一計持貨蝕咗幾多成,舉例股份買入價係5蚊,依家蝕到只有5仙,咁再輸都無得輸去邊,呢個情形買定沽就隨你鍾意。若只係跌一至兩成,可考慮沽出。

Kitty:按機會成本,似乎攞番錢,再揀另一隻買入較划算。

何:我今年三月先第一次入市,只買咗兩隻股份,港燈(02638)及電訊盈科(00008)。我唔理股價波動,最緊要有息收,咁樣就會一直揸,年回報唔錯,平均有逾5厘。之前分注買入電盈,有幾注帳面仍蝕緊。

有朋友專短炒,好大波幅,一晚可以賺1萬元,但一輸就輸番凸。所以都係穩陣收息股較啱我。

轉炒殼股 博賺得更多

馮:一五年港股大時代,我揸住嘅大藍籌,包括中國海洋石油(00883)及中國中車(01766)等,統統輸錢。之後我轉炒殼股,賺得仲多。

Kitty:你買嘅殼股全賺?

馮:唔賺一定唔沽。依家輸緊,只因時機未到,所以我會等。其實我依家總共揸住四隻潛力殼股,包括IBI GROUP HLDGS(01547)、亞積邦租賃(01496)、年年卡(03773),以及應力控股(02663),帳面蝕少少,但我有信心好快會賺,特別睇好建築裝修股。

彩兒:炒殼股風險高,賺得快、蝕得更快。你要小心啲。

馮:我博今年投資回報逾五成!

專家:臨近退休買ETF有着數

彩兒:長揸股票揀咩股最好?

Kitty:可以同我長相廝守嘅,梗係要對我好,派錢畀我使啦。

林:如果就退休,我建議買恒指及A股ETF(交易所買賣基金),適合長揸又唔使頻頻睇住。

彩兒:但呢啲股票直接反映市況,遇上跌市一定低殘。

林:長揸無有怕。若果佢哋由高位下跌兩成,溝貨都仲得。但如果你買科網股,例如騰訊,佢哋最近跌得多,唔代表會見底回升,由高位下跌三成都唔出奇。

Kitty:散戶陳生有大堆三四線股蟹貨,點算好?

林:預期三四線股短期內唔會好。照理每次入市,大家都會諗定止蝕位,若果揸住嘅三四線股跌穿止蝕位,不妨走走貨先。

彩兒:佢仲有揸易鑫。

林:呢隻係汽車龍頭股,長線我都睇好,我自己有揸住。不過,短期內受美國科網股下跌拖累,以及中美貿易摩擦影響,跑輸大市唔出奇。若揸住行業龍頭股,而你又無套現壓力,喺呢個市況,我建議繼續長揸,等佢升。順便一提,長揸短炒都好,都要留意中美貿易談判氣氛行事。

彩兒 Kitty