絲絲講場：小米寵物狗賣萌 紅過雷軍
能夠代表到小米集團（01810）嘅，除咗創辦人兼董事長雷軍外，有位公司「明星」分分鐘紅過雷董，就係佢哋隻代言狗「小米旺財」。旺財喺公司有Title，就係「公司首席萌寵」！
小米旺財仲有自己微博，Fans向佢發私信，會收到回覆添！覆啲乜？有時係「旺旺！」有時係「旺旺旺！」睇佢當時心情。
旺財係真有其狗，狗女嚟嘅，常喺小米北京Office內巡場。佢係一隻混血「中華田園犬」，即係「唐狗」。
曾代言定位電話
佢會唔會係邊位高層由屋企帶過嚟？No啦，佢出身寒微，聽講小米總部大樓當年興建緊時，旺財已喺地盤徘徊，後來得班愛心小米員工收留，加入小米大家庭，做咗全公司唯一冇職號嘅老員工。佢地位超然，係公司明星狗，兩年前仲為小米嘅定位電話做過代言。
搵佢做呢個產品代言亦有段古。可能係流浪狗出身嘅關係，旺財好易受驚，有一年農曆新年被放炮仗嚇親，走失咗成半個月先搵得番佢。公司於是幫佢喺頸度掛咗呢款定位器，等大家可以喺手機度Check住佢喺邊，唔怕佢再走失。
至於早排抽到小米新股嘅你，睇見小米股價連跌三個交易日，尋日收市跌4.3%，報19.02元，你又有冇迷失呢？
余絲韻