絲絲講場:馬斯克賣噴火槍 買家要承諾騎呢條件

身兼特斯拉(Tesla)以至Space X老闆的馬斯克經常會做出一啲出人意表嘅事,佢所創立嘅鑽挖隧道工程商「無聊公司」(Boring Company)繼賣帽子後,大約半年前又開賣每支售價500美元嘅「火燄噴射槍」(Flamethrower),短短四日就售罄,共賣出兩萬支,極速袋走約1,000萬美元(約7,800萬港元)收入。

總部開P 現場提貨

為符合海關運送規例,支槍後來改名,叫「不是火燄噴射槍」(Not a Flamethrower),但其實可以噴出約兩呎火燄。

公司早兩日喺位於加州霍桑嘅總部搞咗個派對,將首1,000支噴射槍交付畀到場嘅買家,現場有音樂表演和食物享用,亦有員工介紹Space X火箭和超迴路隧道嘅模型。

唔准用嚟指住伴侶

至於噴火槍嘅用途,有人話打算用嚟輔助汽車貼膜,有人話打算用嚟點燃火炬,有人話會用於家居保安,亦有「粉絲」話主要係想支持馬斯克嘅大計,特別係改善加州交通擠塞問題。

不過,馬斯克就喺Twitter發文,打趣咁要求買家承諾不會用於屋內、不會用來指着你嘅伴侶、不會以不安全方式使用,最好係用來製作焦糖布丁;又話「火燄噴射槍」可用於燒烤時點火之用。如果冬天家中火爐無木頭,可以直情成支槍擺入去燒咁話喎。

余絲韻