絲絲講場：恒大CEO年薪3億 未算打工皇帝

係唔係舊年搵2.1億港元嘅長和（00001）聯席董事總經理霍建寧？喂！騰訊（00700）總裁劉熾平仲多，舊年酬金去到約2.37億元人民幣！不過一山還有一山高，中國恒大（03333）行政總裁兼執行董事夏海鈞舊年薪酬2.98億元人民幣！

恒大尋日出年報，一睇，相比一六年，夏海鈞嘅薪酬加咗10.31%，唔計購股權與董事袍金，都有成2.8億元人仔o架！恒大舊年整個董事局薪金支出約3.38億元人民幣，單係夏海鈞份酬金就佔咗87.98%！

騰訊兩神秘人各袋逾四億

若以全年365日計，夏海鈞日賺81.66萬元人民幣。據本港打工仔一七年中嘅月入中位數1.68萬港元水平計，打工仔要捱起碼五年騾仔，先賺到佢份日薪。

新鮮出爐嘅上市公司打工皇帝就係夏海鈞？No喎。點解？事關騰訊一七年年報顯示，公司薪酬最高嘅兩位冇開名「神秘人」，分別年賺接近4.3億港元及4.78億港元，仲多過夏海鈞一大截。神秘人究竟會係邊個？絲絲兩個幾星期前咪畀過貼士囉，閣下自己睇番。

余絲韻