絲絲講場：周松崗歡送會超墟冚
香港交易所（00388）主席周松崗周三榮休，除咗如願以償可以喺卸任前（即今日）公布「同股不同權」諮詢總結外，一班業界仲好有心，金融服務界十一個團體連同立法會議員張華峰，尋晚搞咗個告別宴，筵開12圍，過百人歡送周松崗。
掌港交所帶挈經紀大賺
絲絲聽聞，今次仲係第一次由咁多個會一齊合辦告別宴賀周松崗榮休，以往夏佳理、李業廣退任港交所主席時都未試過，最多都係個別會同佢哋歡送咋，咁大陣仗都真係只有今次，周松崗好有面子呢！
有人話，夏佳理年代，港交所實施港股加時，縮短午飯時間，班經紀呻話搞到佢哋冇時間食飯；但周松崗年代又有滬港通、深港通、班經紀應該搵唔少錢，自然同佢「啱嘴形」！
尋晚告別宴嘅菜單好有心思，共有十道菜，象徵十全十美。絲絲祝福佢將來生活更美滿、事事順利！
余絲韻