絲絲講場：稻香股東會 歎茶食點心
尋日天氣雖麻麻，但稻香控股（00573）百幾個小股東依然好神心，晨咁早入去火炭捧股東會場。小股東點解咁熱情？皆因稻香近年聽晒小股東話，股東會由以前排排坐轉做開十幾圍，歎住壺茶食住蟹籽燒賣、酥炸鯪魚球咁開，飲早茶一樣，出席率好難唔高。
稻香行政總裁梁耀進仲話，佢同公司主席鍾偉平，閒時都會同啲小股東飲茶，大家都熟晒。
中餐難撈 酒樓趨細
佢話啲小股東會畀好多營運上嘅意見佢哋，所以佢覺得好感恩。就好似開股東會咁，稻香初上市頭四年嘅股東會，都係同其他公司一樣乖乖排排坐，似足聽講座，後來聽股東意見轉咗開一圍圍圓枱飲茶，結果嚟捧場嘅小股東愈來愈多。
雖然有小股東撐場，梁耀進仍好感慨話，呢兩年香港經營中餐好艱難，有啲業主又想將舖位「劏開」，令稻香旗下食肆今年可能要縮減面積，酒樓面積家陣大多數已縮細到8,000至10,000呎，20,000呎以上嘅大酒樓時代已過去。計絲絲話，大有大做，細有細做，最緊要有得做。
余絲韻