孖妹S檔案：想完美部署？緊貼芬佬思維

黃：豐盛金融資產管理董事 黃國英

梁：基金投資顧問 梁健雄

盧：施羅德基金經理 盧偉良

大把錢途？ 市旺多豪客 股本球球聲

黃：一七年做得好，唔代表之後都Keep到，期望值唔可以太高，若然咁勁，我就係全球數一數二嘅基金經理啦。不過，就算客戶冇Chur自己一八年回報要似一七年咁高，但期望一定高咗，因此我哋嘅壓力自然增加。

Kitty：基金經理唔係人人做得嚟。

彩兒：聽講你哋會好勤力做埋實地考察，例如喺餐廳門口站崗數人流。其實你哋有冇假放？

黃：有啊！我多數放公眾假期，包括聖誕節、新年同復活節等，因為市場上好多人都放假，大市冇咁波動，加上依家環境太平盛世，個市冇咩特別嘢，仲唔放咗先算咩！不過，就算去旅行，我都會拎住個iPad碌吓，係就係慢過電腦操盤，但大致都可以應付到突如其來嘅嘢。

Kitty：放假都要心掛掛……

梁：機不離手已經係常態！我有好多基金經理朋友，每晚都要同團隊講番當日市況。

黃：我喺假期會減少短炒，最多郁啲長倉，咁樣操作，即使反應慢少少都冇咁傷。再者，港股上年十二月初Chok得咁勁，但成交偏低，啲Trend信唔過，所以我哋都減持少少。估計咁樣亦係行內一致嘅做法，但套現少過一成。

月薪達10萬 入職門檻高

彩兒：科網股一七年表現真唔錯，蘋果公司嘅iPhone銷量比預期好，行政總裁庫克嘅人工都即刻加。你哋基金回報賺近五成，公司員工有冇分到多啲花紅呢？

黃：梗係有啦！唔會待薄員工。一七年客仔明顯多咗，個餅愈炒愈大，所以我哋亦有增聘人手，今年仲想請多一個人入市場營銷部添。

梁：基金經理嘅月薪中位數超過8萬至10萬元。上年市況好，自然多人搵基金管理股票投資，一般股本都有一球以上，都係啲退休人士，享受人生一族。當基金回報有逾10%，客戶已經滿足，因為佢哋仲有其他包括房地產投資收入。

Kitty：管理費同基金表現費係點計？有幾多真正落袋？

梁：管理費多數以年度計，再除番交易日數目。基金表現費就係基金每日實質投資回報與特定水平嘅差額之百分比，由基金經理袋。但其採用累計方式，所以如果首日大賺，之後倒蝕，首日賺嘅表現費就要騰番出嚟填，如此類推，直至年結。好處係基金回報波幅冇咁大，令人感覺穩陣啲。

Kitty：人工原來咁高，請唔請我呀？我都識炒股喎！

梁：基金經理入職門檻都幾高，冇聽過讀完大學出嚟就可以即刻入行，求職者至少都要做番五年以上分析員，或者有實戰經驗，並且再靠人搭路先至得。

仲有，基金經理嘅思路同投資態度影響選股，一般人就算唔係為入行，去參加投資講座同佢哋交流都學到嘢。

投資習慣 首季買入傳統穩陣股

彩兒：你哋隻基金究竟喺一七年買咗咩咁勁，賺近五成？係咪同盈富基金（02800）組合類近？

黃：騰訊控股（00700）就唔使講喇，但只佔長倉唔夠10%。我哋不嬲唔用盈富基金做指標，我哋基金冇香港地產股，亦冇內房或公用股，最多都係得房地產信託基金，例如領展房產基金（00823）。至於金融股佔比，我哋少好多，佔比最相近都係友邦保險（01299）同中國平安（02318）。

彩兒：50隻謎網股令一眾股友心驚膽戰，上年有幾隻股真係被DQ咗，你有冇提醒員工唔好掂？

黃：佢哋識啦！我自己就梗係唔掂，唔嘥時間喇。

Kitty：你咁公開話畀我知，驚唔驚人抄足你？

黃：傻啦！就算你坐我隔籬，望住我落幾多注、中間點樣走位，都要睇你夠唔夠薑跟。

靈活應對 忌一注獨贏

Kitty：公司唔係得你一個操盤，你點控制回報率？

黃：我有多一個交易拍檔，規則又唔會好死，我只會提點佢控制注碼、虧蝕，以及了解佢慣常嘅投資風格。另外，唔建議一注獨贏，否則個本大咗，都係用唔番相同技術。我哋買個股嘅佔比一般唔超過3%。追求Scalability（可擴展性），即係要一個容納更多錢嘅打法！

Kitty：好老細。

黃：過獎喇。我通常以年度基金回報嚟評核員工表現，所以佢哋幾日甚至兩個禮拜都唔轉倉，我都唔理。

彩兒：坊間講嘅年尾托市沽貨，年頭趁低吸納，係咪真有其事？

梁：基金經理最重視嘅係半年結同年結，同客人交代，寫份報告公開仲Hold住咩貨。如果某隻股份半年嚟表現麻麻甚至蝕錢，佢哋結算前多數會沽出，等個盤靚靚仔仔。再者，依家個市，唔係話基金經理想托就托得住，皆因北水太多。

彩兒：基金經理嘅年度投資習慣係點？

梁：佢哋第一季多數買傳統穩陣股份，收吓息，務求令回報見得人，所以公司開「吸水會」搵客變得更理所當然。

Kitty：一於搞個醒獅大會造勢！型爆！

彩兒：市旺時，港股參與人數自然多啲，基金經理點可以唔把握機會吸水呀！

梁：年頭吸唔到水，全年就會好慘。去到第二季，佢哋就會轉而買入進取型嘅二、三線股份，博高啲回報。否則埋單一計，基金表現跟恒指差唔多，仲要減埋管理費，成績表就會好樣衰！至於今年第三季，我估計有唔少「同股不同權」架構股份會喺香港上市，屆時科網股有得炒，我料基金經理會增持科網股。我唔太睇好今年第四季，對於基金會買咩亦捉唔到路。

市況展望 經濟體復甦 北水撐港股

Kitty：一八年市況有冇機會跑贏一七年？

黃：我對一八年都幾樂觀，因大部分經濟體增長動力不俗，同埋買Winner嘅投資策略仍用得着，我睇好港股，因有北水湧入。

盧：全靠過去內地信貸增長強勁及寬鬆的財政政策，以及科網股強勁的盈利增長，同時借助港股通（滬深）南下嘅北水，大中華股票於一七年表現強勁，MSCI中國指數大升近半。

惟十九大開完會，見中國政府對於經濟增長重質多過重量，唔再追求更高GDP增長目標，因此預計中國經濟增長會稍為減慢，企業盈利增長亦只會保持平穩。另外，物料價格上升，對於中游消費工業，特別係冇定價權利嘅企業，其盈利壓力將會增加。中國國家主席習近平表示，房屋係用嚟住，唔係用嚟炒賣，我相信內房會繼續受壓。

Kitty：睇好咩股份？

盧：息率見底回升，內險同香港大型銀行盈利增長動力會高啲。受惠強勁內需，消費服務、科網、旅遊及教育等股份嘅表現應該唔錯。

內地通脹料漸升溫

Kitty：有咩風險要注意？

黃：一八年通脹可能會加快，估計內地消費物價指數及人均薪酬都會攀升，一直以嚟嘅低通脹情況，將會有變數。

美國通過稅改，財赤問題加劇，美元同債價都弱，明顯反映投資者擔心美國債務問題。至於中國，投資者唔再擔心去槓桿壓抑經濟，總覺得會帶嚟好消息，令到投資氣氛趨旺。

若有料報畀彩兒同Kitty或有嘢問，可電郵money.biz@on.cc

Kitty 彩兒