美國聯儲局宣布維持息口不變，十月縮表如期進行，唯一有少少爆冷係年底前會再加息一次的講法，但阻唔到美股狂牛，標指同道指再創新高，美元、美債孳息雙雙反彈。
昨日除地產股唔精神外，整體大市個別發展，恒指維持喺過去兩日兩萬八點樓上浮沉，收市微跌17點報28,110點，內房及濠賭股成焦點，最搶眼的金地商置（00535）升13.8%，世茂房地產（00813）升5%，中國恒大（03333）升4.6%。
近排新股熱度明顯回升，昨日上市做玩具的童園國際（03830），挾着過千億超購，開出第一口價已見0.75元，埋單收報0.78元，較招股價高六成二。重頭戲係下周四掛牌的眾安在綫（06060），單係加埋各間散戶證券行放出的孖展，估計閒閒哋都超購130至150倍，肯定觸發回撥，令散戶認購股份佔發售股份比例由5%升至20%，但路邊社消息話未必能夠一人一手。
萬眾期待的眾安，掛牌日碰啱期指結算，睇嚟有機會幫到個市挑戰28,588點的大時代高位阻力。打着香港首隻FinTech（金融科技）重磅股旗號，未上市已經先聲奪人，昨日個市將一堆資訊科技股當正FinTech股咁炒，實行攞嚟做眾安上市前熱身。中金公司（03908）、金蝶國際（00268）、金山軟件（03888）、美圖公司（01357）甚至由地產轉攻互聯網金融服務的綠地香港（00337），全部鑊氣大盛。
老實講，個市真係有能力走入FinTech範疇的，古勝數來數去得中國平安保險（02318）同騰訊（00700）兩隻，大家趁氣氛炒影子股無問題，但要識睇風向。
惠譽上調碧桂園（02007）高級無抵押評級及未償還票據評級，由BB+上調至BBB-，簡單講，碧桂園再發債的話，息口可再低啲。睇番周初跟內房強勢攻上15.06元，抖咗三日，成交縮晒，似乎14元水平已足夠消化近日升幅，想博消息衝多浸，若今日開14.3元樓下，可以同佢玩吓。
古勝