絲絲講場：個人信貸評級6謬誤你要知

誤解1：即時還清卡數可Upgrade評級

65%受訪者以為真係得！信貸資料機構環聯香港個人客戶業務總監羅瑞（Lawrence）話，即時還清卡數當然唔會有損信貸評級，但對提升評級亦冇直接幫助。不過咁，定期準時還款，始終好啲。

誤解2：附屬卡只影響附屬卡卡主評級

好明顯係錯！Lawrence解釋，由於張附屬卡係同主卡卡主掛鈎嘅，所以附屬卡如果遲咗找數只會影響到主卡卡主嘅信貸狀況，但唔會記入附屬卡卡主嘅信貸紀錄入面！嗱，呢個簡直係全篇嘅亮點！

誤解3：齋用ATM唔碌信用卡有助提升評級

竟然有四分一受訪者係咁諗！Lawrence話，齋用ATM卡雖有助量入為出，但咁反映唔到閣下嘅信貸管理能力，所以唔會直接對信貸評級構成影響。

誤解4：誤解向多幾間銀行Check吓自己借錢幾高息，冇乜嘢啫

六成人以為冇乜嘢。查實當要釐定申請人貸款利率時，銀行需先向信貸資料機構查閱申請人個人信貸紀錄，用作參考決定息口，呢樣嘢會記錄於信貸報告中長達兩年，隨時有可能影響信貸評級。不過咁，若係閣下自己去查閱個人信貸報告，就唔受影響。

誤解5：信貸資料機構決定信用卡申請批核與否

超過一半受訪者以為係咁。事實上，批核信貸申請嘅最終決定權，喺銀行及發卡機構手上。Lawrence話環聯只負責為金融機構提供申請人嘅信貸紀錄，協助評估申請人面對信貸風險時嘅還款能力。

誤解6：想知自己信貸報告一定要畀錢

平日想查，冇錯係要畀差不多幾舊水。但你有所不知，若閣下借錢申請被銀行拒絕咗，而銀行審批時又曾透過環聯參考過你嘅信貸資料，咁你就可以按拒絕信上嘅指示登入環聯網頁，免費睇番自己最新嘅信貸報告，即知自己衰乜。

余絲韻