北水頭等倉:金軟值得分注收集

本來兩地魚缸仍是一潭死水,但受到國家主席習近平話,「十三五」內地經濟年均增長不應低於6.5%,再加理人行網站文章引述行長周小川話「今年還要推出深港通」的消息提振,重燃市場對年內深港通的希望,恒指昨日最高搶到上23,342點,終於打破悶局!

冷不防中午卻傳來人行澄清,有關言論實為五月講話,即係「開玩笑」﹗下午開市前相信唔少好友聞言後心情由高峰跌落谷底,但奇怪係,午後A股唔肯回仲要繼續升,而港股落到23,000點亦現承接,成交仲增加至1,120億元。

呢個現象證明真係有錢泊喺香港等最佳時候入場買貨。不過,見滬港通推出接近一年,表現遜預期,深港通推出後會唔會有突破?反正平常心,沒太大期望自然唔會有太過失望。

券商股靜觀其變

兩地金融股受誤報深港通消息提振,普遍有半成至一成升幅。不過,筆者唔建議高追,因內地金融業打貪行動唔知仲有咩消息跟尾,而深港通實際上要明年先至通車,呢轉券商股炒作唔排除都係一、兩日貨仔。若昨日上午未有入場,都係靜觀其變為妙。

反觀,「十三五」要扶持多個戰略產業,「互聯網+」是其中一瓣重點支持新興產業,投資中國市場的股票組合必會沾手呢個板塊。類似大型科技軟件股金山軟件(03888),現價18.62元,較52周高位回落46%,往績市盈率22倍。

今年上半年公司進行移動轉型、全球化以及「ALL-INCLOUD」戰略,相信今年大力投資移動業務及雲業務的策略,可為長期增長奠下良好基礎,實力投資者可分注作中長線收集。

走勢上,昨日金軟股價隨大市向上,成交增至4.88億元,短線較大阻力在250日線20.65元,中線唔難上番22至23元水平,初步支持在16.5元。

司慕渢