絲絲講場:李秀恒屋企遮筒值數百萬

香港中華廠商聯合會會長李秀恒(Eddy Li)係本港著名鐘錶商就係人都知,原來佢除咗鍾意收藏鐘錶之外,仲好鍾意鑑賞古董,自己並且收藏唔少古玩及傢俬,並且深諳投資之道添!

原來從前Eddy最着迷歐洲嘅古老大鐘,但又發覺收藏大鐘有一個大難題—─機器最終會老化或損壞,就只能變成一件擺設品。

應邀教古董投資

自此以後,Eddy就開始收藏其他古玩藝術品,好似官窯瓷器同明朝家具等。絲絲之前去過佢屋企,咁啱又落雨,諗住擺好把遮先。點知一個價值數百萬,近腰高嘅青花大罎就係個遮筒,仲要係外國領事館擺放過嘅一件古董嚟!我問Eddy會唔會太浪費,佢答我:「唔整爛佢,佢嘅價值就永遠存在。」嚟緊Eddy嘅公司仲會投資埋古董藝術品,到時價值就真係再上一層樓。

絲絲仲聽講香港大學校友講座搵咗Eddy做嘉賓,喺今個月十日(下周二)晚,主講有關古董鑑賞同投資竅門,真係搵啱人啊!

余絲韻