孖妹Ｓ檔案：11‧11又開鑼 電商股鬥Rock

行家勢劈價谷GMV

王：易方資本投資總監　王華（Fred）

Kitty：光棍節喺○九年開始畀電商公司「騎劫」，變成狂歡購物節，雙十一嘅戰略仲Work咩？

王：雖然內地GDP（國內生產總值）增長弱，消費信心都係麻麻，不過線上銷售搶緊線下銷售，所以電商GMV Growth（交易總額增長）唔會差，阿里巴巴（下稱阿里，美股：BABA）有任務在身，實唔會公布一個差嘅數字，況且雙十一嘅銷售數字不嬲都好勁，但其後經常會出現退貨嘅情況，又或者係取消交易，所以數字存在水分，只係在於多與少。另外，GMV好唔好都視乎商家肯唔肯減價，顧及消費市道咁差，同上年同期情況完全唔同，嗰陣需求較大，現時庫存問題嚴峻，肯減價機會大。

易方資本王華估計，阿里最直接受惠雙十一。	豐盛馮宏遠表示，電商股有反彈空間。　（洪業銘攝）	放大圖片

3C產品或成主戰場

王：雙十一戰略相當重要，佔電商下半年銷售好大佔比，唔單止阿里，連京東（美股：JD）、蘇寧雲商（002024.SZ），同埋其他電商都會一齊減價促銷，京東月頭已經偷步減添喇，相信消費會突然增強，最直接受惠雙十一當然係阿里，佢GMV增長動力較有保證。

彩兒：阿里雖然係行內龍頭，但要坐穩呢個位都冇咁易！

王：阿里有一啲特別嘅亮點投資者應留意。由於公司規模差得遠，佢以前唔當京東係對手，主因即使京東急起直追，但單計阿里旗下天貓都已經大過京東幾倍，而且前者生意係賺錢，京東仲係蝕緊少少，但係阿里睇到3C產品（電腦、通訊及消費電子產品）係京東嘅強項，預計今年阿里會集中火力谷呢個範疇挑戰京東。

王：另一方面，可以睇吓流量導入嘅情況。淘寶同天貓原本經營模式中心化，用App買嘢就需要直接開個App，但隨住佢收購或同其他公司合作，勢會導入流量。例如，阿里收購咗優酷土豆（美股：YOKU），如果喺優酷賣廣告，就可以導入流量去淘寶與天貓。仲有，阿里想做媒體之王、想做梅鐸，相信未來喺媒體上都可以引入流量，流量導入口會持續增加，事關對於消費者嚟講，價錢係緊要，但方便性同樣重要。

參考指標Take Rate

Kitty：仲有乜重要指標可以盯實阿里盤生意？

王：淘寶唔收商家佣金，但若商家唔落廣告，潛在客戶就Search唔到佢旗下產品；天貓不設廣告，但需抽佣予阿里。廣告收入係構成Take Rate（電商平台從交易額所得的收入比例）的重要元素，Take Rate係評估阿里嘅其中一個核心指標。隨住消費者利用移動設備進行交易嘅比例不斷增加，商家會將更多廣告預算轉去移動平台，未來係重要增長動力。我哋不嬲唔多鍾意阿里，以前仲勁沽空佢，但自從佢曾穿過60美元後，就大部分時間做長倉。

龍頭阿里睇95美元

馮：豐盛金融分析員　馮宏遠（Thomas）

彩兒：趁雙十一前炒定電商股，幫唔幫到我儲錢大出血？

馮：對於歐美投資者嚟講，投資中港市場流通性唔及美股高，佢哋寧願直接買喺當地上市嘅中資電商股，貪出入夠快，相信相關電商股會較值博。早前電商股走勢差勁，主因市盈率動輒去到40至50倍，但目前股價回落，反映咗內地經濟下行風險，同埋電商盈利達唔到市場預期嘅問題，料整個內地電商行業喺雙十一GMV增長平均有20至30%，現時相關股股價偏低，料會趁勢出現炒作，有反彈空間！

聚美高增長恐不再

馮：我認為唯品會（美股：VIPS）及聚美優品（美股：JMEI），高增長情況或難以持續。唯品會以前成功係因為折價模式，幫助唔少內地體育用品及內地名牌去庫存，最美好嗰陣係廠商排隊見公司人員，當時佢可以抽取網購交易嘅邊際利潤去擴充規模，但係一年前唔少廠商已經走出庫存問題嘅陣痛，現已變得理智，所以唯品會原有角色漸褪色，開始踩過界掂埋美容範疇，轉型後似足聚美優品，即使新業務有增長，但相關業務門檻低，未來會有入場者對撼，競爭勢加劇，加上假貨與高入口稅問題，面對「求真唔求平」嘅客戶，未來會難做。

Kitty：你心水之選係乜？

馮：阿里市值、GMV增長現時已好勁，未來增長成疑，將視乎一線城市年輕人或準中產嘅網購消費力是否可維持，佢身為巨無霸，正開展其他業務，如影視同埋保健行業，未來盈利增長不確定性勢增，但優勢在於內地人冇咗佢唔得，即使佢假貨多，但身為「網購界TVB」，暫冇競爭者可取代佢，對歐美資金而言係非必需消費品龍頭，仍有吸引力，可喺76至80美元買入中線持有，料股價喺直至明年三月可向好，上望95美元，止蝕位70美元。

銀泰概念強望炒高

馮：京東次季度GMV按年增長有82%，但市場仍唔滿意，覺得放緩，屬利淡因素。不過，佢家電銷售業務穩健，擁有固有地盤，同騰訊（00700）合作後將被視為係阿里嘅競爭對手，未來最理想係成為內地超級市場龍頭，其市銷率目前係2倍以下，屬於偏平，不妨小注於28美元買入中長線持有，博佢喺電商爭霸戰佔據有利地位，須留意股價波動性高，止蝕位要放得遠啲，建議放喺8美元。

彩兒：如果唔想隔山打牛，又有乜揀？

馮：銀泰商業（01833）原為傳統百貨股，自從獲得阿里入股及成為大股東後，成為O2O電商消費股，屬阿里概念最強、可受惠雙十一嘅港股，有機會被順勢炒起，建議9元買入短炒，上望10.5元，止蝕位8.4元。

若有料報畀彩兒同Kitty或有嘢問，可電郵money.biz@on.cc