老闆畀唔少人嘅印象就係高高在上，可以嘅話盡量避免正面溝通，正所謂「唔講唔錯」呀嘛，講錯嘢隨時飯碗都保唔住。
騰訊（00700）就有個膽生毛嘅員工，因為唔滿意公司主席馬化騰要求喺頁面加入某種功能，就直接send電郵畀馬化騰話無可能做到。send完之後，個員工都知自己衰多口，正想認衰仔。
之不過馬化騰無因為收到電郵而炒咗佢，反而親自回電郵教佢點解決問題，列舉相關方面嘅專才同聯絡方法幫佢解決問題。馬化騰仲嚴正警告，唔可以話技術做唔到。而聽講，原來馬化騰一向都鍾意親自回覆員工電郵添！
喺老闆心目中，請員工返嚟係做嘢，解決問題，而唔係同老闆講「無可能」。如果老闆唔係馬化騰，見到你封電郵話老闆建議「無可能」，質疑老闆，老闆火遮眼，分分鐘即時炒你。而馬化騰喺處理呢次員工電郵事件中，被讚夠親民，起碼係一個唔會郁啲就炒人嘅好老闆嚟！
余絲韻