絲絲講場：HK Express一蚊機票賀周歲
廉航愈嚟愈多，用家有福囉。好似轉型做咗廉航嘅HK Express，趁一歲生日，推平價機票益街坊，唔知會唔會搞到競爭對手出招搶客呢？
每日凌晨推出 共兩萬張
向來好有諗頭嘅佢哋決定推出1蚊機票嘅優惠冧大家！呢個活動已經由尋日晏晝開始咗，首站喺日本福崗，行政副總裁Andrew Cowen仲話，總共有兩萬張優惠機票，每日凌晨推出唔同嘅航點，就連東京、首爾等熱門旅遊地點都有得揀。平飛直至到今個月廿六號，手快有手慢無，不過提提大家，機場稅同其他雜費係唔包在內嘅！
Cowen話嚟緊嘅二○一五年，佢哋已經有全盤大計，包括增加航點到30個，又增加機隊到15架，更重要嘅係，佢話有信心出年公司就會有盈利。
不過，講到同系嘅香港航空計劃申請喺香港上市，Cowen就唔願多講喇，話始終兩間公司唔同團隊，佢真係唔知道咁多，反正HK Express依家就暫時無集資上市嘅計劃咁喎！
余絲韻