作為中國主權財富基金嘅中投，終於搵到合適嘅首席投資官（CIO）人選嘞，據市場傳言，全國社保基金理事會副理事長李克平好快就會加盟中投做CIO，唔使總經理高西慶再身兼兩職。
大家可能對李克平唔係咁熟悉，佢與高西慶、中投首席風險官汪建熙嘅年紀差唔多，九十年代時，佢一直喺當時仲叫做「體改委」嘅部門工作，與中證監副主席李小雪係同事。
全國社保基金喺○一年成立，李克平當時已經加入，擔任投資部主任及新聞發言人。直到○七年六月，佢升任為秘書長，半年後仲榮升副理事長。前後計埋，李克平喺社保基金已經有十年咁耐，絕對係老臣子。
李克平喺社保專職投資部門，就算做咗副理事長，佢一樣會帶團外訪及接見外賓。其實中投與社保基金好有淵源，高西慶以前都做過社保基金副理事長，去年中投甚至與社保基金聯手認購新加坡投資公司旗下普洛斯嘅新股，依家市傳李克平過檔社保，聽落都好有道理。
余絲韻