絲絲係典型嘅優皮港女，鍾意名牌又鍾意靚仔球星，一聽到「紅魔鬼」曼聯正研究嚟香港上市，真係開心到彈起。曼聯喺香港上市肯定哄動，「賓卡」界依家最關心嘅係邊間投行會執到呢支好籌，做佢哋嘅保薦人，絲絲打電話畀靚仔「賓卡」老友收風，佢即刻答我話：梗係高盛啦！
老友話投行界收到風，曼聯嘅美國班主格拉沙家族（The Glazer family）已搵咗高盛負責遴選保薦及承銷團隊，所以一切睇高盛做頭，原因有三個：其一係格拉沙家族話明，曼聯會參考Prada喺香港嘅招股反應，然後再作決定，而高盛正係Prada嘅保薦人；其二係高盛資產管理主席奧尼爾對於曼聯爭人周身債睇唔過眼，去年曾號召其他曼聯球迷組成「紅武士」（Red Knights）組織，籌15億英鎊想買起曼聯，最後雖然失敗，但據聞佢好希望睇到曼聯證券化，因為可以搵機會做曼聯股東監察球會，甚至做大股東入埋董事局；其三係格拉沙乃美籍猶太人，而高盛係由知名猶太人創辦嘅最賺錢投行，猶太人嘅性格就好似潮州人嗰句「家己冷」，街外錢當然會益吓鄉里齊齊搵。
絲絲覺得「賓卡」老友真係講得有道理，希望「紅魔鬼」真係會嚟香港上市，話唔埋佢哋嘅重點球星，好似朗尼、查維亞靴南迪斯等會來港做吓Road Show兼出席上市儀式，作為曼聯fans嘅絲絲，到時一定用私己錢買番幾手貨。
余絲韻