絲絲講場：耀才廣開分行多搞作
耀才證券近期不斷喺全港各地區擴充分行，尋日就喺銅鑼灣金朝陽中心開舖，耀才證券主席葉茂林、行政總裁陳啟峰及市務總監郭思治（郭Sir）等管理層主持開幕禮，現場更有財神爺向散戶派發利是，氣氛鬼咁熱鬧。
郭Sir透露，耀才嚟緊有好多大計，員工上下一定有排忙。眾所周知，郭Sir嘅身形咁Fit，全靠日日勤力做Gym，但佢依家咁忙，真係有分身術都唔掂啦，怪唔得佢話：「朝早同中午都冇時間做Gym喇，惟有喺放工之後，夜晚十點鐘先至喺屋企做啦。」
猛將出鏡解疑難
郭Sir口中嘅大計，包括由葉主席親自宣布嘅「耀才財經台」計劃喺本月啟播，除咗有星級講師郭Sir之外，仲有其他耀才分析員出鏡為散戶解答股市難題。唔係賣花讚花香，郭Sir坦言呢個財經台可謂創業界先河，散戶除咗可登入耀才網頁睇電視外，耀才各分行亦會設置高清電視，全日直播該財經節目，為客戶提供即時市況及最新股票交易資訊。
余絲韻