絲絲講場：渣打莊貝思風趣鬼馬
渣打集團主席莊貝思（John Peace）個名就聽得多，但絲絲一次都未見過佢真身，尋日有幸喺渣打業績發布會上見到佢，原來佢個人非常風趣幽默，多次引來現場唔少笑聲。
呢啲主席人物通常都好識入鄉隨俗，佢首次在港主持業績發布會，第一句說話就用廣東話與香港嘅朋友問安，講句「各位香港朋友，你哋好」，當然下一句已轉番英語頻道。
出口幫洪丕正解窘
日前有券商建議渣打嘅投資者轉投滙控（00005）懷抱，莊貝思被問到點睇，佢就作狀咁話「How dare they（佢哋夠膽）？」跟住就話過去幾年時間，睇番渣打股東總回報，包括股價升幅及派息，其實買渣打股份真係一項好好嘅投資，所以有強烈理由支持買入渣打，同時要繼續持有渣打。
由於渣打香港地區嘅業績差強人意，仲畀印度爬頭成為集團盈利貢獻嘅第一位，主責香港業務嘅阿Ben（洪丕正）成為眾人追問嘅焦點，問到佢有乜感受，莊貝思都好識維護下屬，以「阿Ben係贏家」替下屬回應呢個問題。
余絲韻