李昭南屢被性騷擾鬧爆偷拍者
歌手吳浩康舊愛、美國華埠小姐李昭南（Mishy）最近拍攝有關性騷擾題材的劇集，她自爆現實中收過不雅照片和被偷拍，認為女性不應助長歪風，要勇敢站出來發聲！
藝人李昭南、陳俞希（Hailey）與英健朗（小占）首次合作ViuTV新劇《假設性無罪》，三人均指角色很有發揮。身材惹火的Mishy坦言現實中被性騷擾，曾收過性器官照片、不雅錄音和被人偷拍：「試過有次被人偷拍，畀我發現咗，即刻捉住佢鬧，仲發現唔只我一個受害者，手機入面仲有其他女仔嘅相。我哋希望透過呢套劇話畀人聽，忍受都係一種助長，出聲唔只為自己，亦係減少受害者出現。」
從演以來最性感
Mishy坦言於劇中造型火辣，是從演以來最性感，每次花逾半小時黐膠紙做防走光措施：「劇入面我成日對客，啲衫一係好貼身，一係就露背同事業線。記得第一日開工，個個見到我啲衫都呆咗，大家都好尷尬，唔敢同我對望，不過之後佢哋慣咗，就當我透明。」
而Hailey表示內心戲較重，比以往更有發揮：「我飾演王敏奕嘅好朋友，係好細膽嘅人，對任何同事吩咐都唔會拒絕，有場戲講我以前受到性騷擾嘅經歷，好考演技。」
劇集題材貼地，更有好戲之人張慧儀及梁漢文坐鎮，作為後輩的三人初時大感壓力，小占說：「佢哋冇畀壓力我哋，壓力係自己畀自己，驚做得唔好。慧儀姐唔笑個樣都幾惡，不過原來佢都好玩得，大家戲外會玩啲小遊戲，輸咗要罰錢，好似一家人好歡樂。」
場地：Mini Hotel