欣宜斷腳復工預告勁舞開騷

歌手鄭欣宜早前在外地旅行時樂極生悲,跳水斷腳,她接受手術前自拍爆喊短片,擔心傷後不復昔日靈活,影響明年首登紅館開騷。昨日欣宜手術後首度露面,撐着兩支拐杖上落樓梯。原先安排開騷時跳勁舞的她對康復進度樂觀:「我都會繼續挑戰呢樣嘢!」

歌手鄭欣宜早前跳水斷腳受傷,手術後昨日首度現身電台,電台為方便腳傷的她坐輪椅上落,特意在正門前的梯級放置斜台。欣宜落車時撐着兩支拐杖,見其左腳打了石膏,行到梯級前一級一級跳上去。完成直播訪問後,她再撐着拐杖會見傳媒。

抬高腳沖涼

對於今次受傷,欣宜自嘲:「呢次受傷係100%嘅『Kai』,因為收到明年4月22日紅館嘅檔期開心到癲咗,諗住去個旅行,返嚟就修心養性準備呢個咁大嘅舞台,點知玩到整親腳。」她稱最抱歉是不能出席汪明荃的入行50周年騷,因為對方親自致電邀請,本身她早已答應唱歌跳舞,但因要做手術,故只能向汪明荃說對不起。

問到傷勢可有影響工作?欣宜稱:「依家打咗石膏,接咗嘅工作都會盡量做,廣告客戶都好好,話可以改期或只拍上半身遷就。(沖涼最唔方便?)因為屋企沖涼位係有一級樓梯,好彩物理治療師都有教點上樓梯,同埋要包住腳,隻腳抬高先沖涼。」她又指大約兩星期後拆走石膏,之後換上吹氣石膏。講到當日手術前拍片爆喊,她坦言愛跳舞及穿高跟鞋,怕痊愈後不能回復以前靈活,故特別緊張。

「發癲冇用」

提到音樂人黃偉文指她有意在個唱上獻唱天后的作品,欣宜表示:「本身係構思一Part似考牌咁,跳勁舞挑戰紅館舞台,但我都會繼續挑戰呢樣嘢,對我係一個推動力。物理治療師都教識我做人要向前望,發癲係冇用,要正面向前行先啱。」她又自爆當日受傷前沙灘沒有人,但受傷後,不少型男即走出來扶她,痛楚大減。

文:音樂組

攝:林蔚恩