黎耀祥嫌黃嘉雯唔夠嘴甜
藝人黎耀祥、蕭正楠、曹永廉及黃浩然由「公公」變身「公爵」，與15位候選港姐佳麗於澳門拍攝，眾人笑言不需向另一半備案，但就眼看手勿動。黎耀祥指對兩位大熱黃嘉雯及蔡嘉欣印象較深，讚台型十足，惟口才仍需改善。
黎耀祥、蕭正楠、曹永廉、黃浩然昨日與15位候選港姐到澳門拍攝無綫節目《香港小姐公爵特訓班》，眾女以晚裝示人。四位「公爵」向來唱得又Talk得，故佳麗難免緊張，就連「老練」的蔡嘉欣及黃嘉雯都被指要改善口才。
曹永廉視力唔好要靠摸
活動時，四位「公爵」好識做大搞氣氛，問與靚女拍攝有否向另一半備案？曹永廉笑說：「𥄫女冇問題，掂就唔得。」蕭正楠即取笑他：「但係你對眼唔好，要摸吓先知。」曹永廉笑說：「仲未摸。」黎耀祥讚佳麗質素不俗，又笑言選美總有兩、三個不好，黃浩然即望着曹永廉笑說：「好似我哋咁，樹大都會有枯枝。」阿廉即反擊：「你講時講，唔好望住我講。」
黎耀祥對於大熱黃嘉雯及蔡嘉欣最有印象，皆因二人外形好、有台型，但口才有待改善：「唔識講嘢，觀眾評判都會打折扣。」有選美經驗的黃嘉雯面對密集式拍攝表示習慣，不覺辛苦。楊詠彤指雖然拍攝時間有點長，但很好玩。問到面對四位口才好的嘉賓可有招架不住？二人均表示嘉賓令她們變得輕鬆，沒那麼緊張。
楊詠彤做瑜伽修線條
對於被指口才麻麻，黃嘉雯說：「對住前輩心情會緊張啲，平時亦冇乜機會練習講嘢，會加緊訓練。之前學戲老師教我哋讀報紙去練口才。」她還希望練到腹肌，不想成條柴般，而楊詠彤表示會多做瑜伽，令線條更美。
其他佳麗如王菲被問到拍攝時可有捱鬧，她說：「唔係鬧，只係有時趕時間，會叫我哋手腳快啲，可以早啲休息。」黃詠柔亦指只是溫馨提示，幸自己冇乜NG，四位嘉賓也提點她們不用太拘謹。