蔡卓妍再雪卵唔關男友事？
蔡卓妍（阿Sa）前晚抱病出席品牌活動，自爆月初進行第2次雪卵手術，同時又要為8月舞台劇排練，致體力透支。她透露今次合共雪20多粒卵子，問為何要做第2次？她說：「其實係一個保障，之後再拎番出嚟用要解凍，存活率得7成，未必用到，多啲就穩陣啲。」問到男友石恆聰有何獎勵？她大笑說：「咁都關佢事咩？我自己嘢嚟！」之後轉話題指現時心急減肥：「今次雪卵比上次肥。（肥咗幾多？）冇磅呀，肉眼都睇見，尋日去探容祖兒綵排，我話佢好瘦，然後佢一手插去我條腰，講咗句『你都好……做番啲運動』！」
講到好姊妹鍾欣潼日前出活動突然脹爆疑有喜，阿Sa代否認：「佢賀爾蒙失調，都有介紹婦科醫生畀佢，希望幫到手。（佢畀人話大肚有冇唔開心？）唔可以代佢答，女仔聽到都會有啲唔開心，不過佢比較樂觀，最多一齊減肥。」
同場的余德丞透露現時手上有兩個綜藝節目，包括《香港原味道》及《娛樂大家》，並透露《娛》正籌備第二季，問到可會原班人馬？他說：「冇聽過有改變，可能啲遊戲會變，都未返去開會。」又派定心丸稱身體已全面康復，宣布重回游泳及足球「懷抱」。