名牌：岑麗香穿越時空返「加」搵老公慶祝
藝人岑麗香昨日現身馬場，碰巧亦是其結婚一周年紀念日，工作完畢後即要飛往加拿大與丈夫會合慶祝，她稱因時差關係，飛到當地仍是結婚紀念日，笑言彷彿穿越時空。
昨日是岑麗香（香香）與丈夫強強的結婚一周年紀念，升呢人妻後仍不忘工作的她，現身沙田馬場舉辦的「六福珠寶賽馬日」，並聯同六位應屆港姐，包括冠軍雷莊𠒇、亞軍何依婷、季軍黃瑋琦、big big channel最受歡迎香港小姐張寶欣、邱晴及伍樂怡為六福珠寶擔任模特兒行騷。眾人均身穿由本地時裝設計師何國鉦設計的晚裝上陣，並與六福集團主席兼行政總裁黃偉常、香港賽馬會賽馬業務及營運執行總監祁立賢、香港賽馬會行政總裁應家柏一同主持祝酒儀式，同場還有品牌代言人林峯、藝人周美欣、陳倩揚、梁嘉琪、顏子菲、陳爽、葉蘊儀、名人王嘉恩及陳兆榮等，場面熱鬧。
怕溫暖牌多窿
香香表示活動完畢後，就要穿越時空出發飛往加拿大會合老公，慶祝結婚一周年：「因為我飛到去當地都仲係17號，好感謝時差，而且有班飛機嘅時間又咁啱。（送咩禮物畀老公？）我等佢送嘅禮物，我要穿越時空喎，交畀佢安排，相信佢會諗到。」現場頻呼好凍的香香，被問到老公平日會否為她送暖，她甜笑說一定會，又指喜歡對方愛的抱抱。問到有否為老公織過溫暖牌？她坦言：「我怕織出嚟佢會驚，一嚟要好多時間，而且會有好多窿，不過我相信就算好多窿，老公都會着，佢都幾鍾意呢啲嘢。（DIY手作仔畀老公？）冇試過，我哋唔會做手作，我哋多數寫字，覺得係一個記錄，將來可以睇番。」
雷莊𠒇拒黐膠紙
至於雷莊𠒇穿上Deep V連身裙騷波邊，談到衣着性感，她稱會小心：「出場前已經做足準備，肯定唔會走光。（黐晒膠紙？）冇，但都OK，因為條裙好啱身。」她表示今次是首度行珠寶騷，亦是第一次到沙田馬場，問到會否投注？她坦言：「我好驚輸，永遠都唔會賭錢，但作為運動去睇係好好睇，我自己都學過策騎，好好玩，但後來打排球，所以冇時間再學。」
文：名人組