黎明夢境成真曱甴入耳
天王黎明（Leon）上周一在北京拍戲中度過51歲生辰，前晚就身在澳門開騷，唱歌之餘亦大拋金句變Talk騷，自爆和曱甴有緣，夜晚總與曱甴相遇，惟有用殘酷手段處決，更不願做靚仔，認為做人蠢蠢哋先至幸福。
【衛紫敏澳門直擊】黎明於澳門威尼斯人金光綜藝館舉行「黎明LEON RANDOM RUN 2017」演唱會，戴上巨型閃燈皇冠黑超Look，襯紅銀色閃爆外套出場，與嘉年華打扮的舞蹈員又跳又唱，氣氛high爆。唱完一輪快歌後，Leon滿頭大汗不停抹，帶出人體構造的偉論：「人構造好簡單，有人腳底出汗，有人頭頂出汗，我就完全屬於頭頂嗰種。」接着拿起毛巾時，發現是歌迷給他的禮物：「有時講緣分，如果唔係過嚟抹汗，都唔知呢度有份禮物。」
殘酷手法消滅
個唱如變成Talk騷，Leon自爆與曱甴好有緣分，夜晚屋企起身飲水都會見到曱甴出現。有歌迷問黎明是否怕曱甴？他說：「以前驚，依家唔驚啦！正如蝙蝠俠克服咗蝙蝠一樣，我以前驚曱甴係因為細個發夢夢到曱甴入咗我耳仔，嚇到醒咗，發覺真係有曱甴，最終我好殘酷咁消滅咗佢，呢個世界好多曱甴，周圍都有，冇辦法喇，大家惟有小心啲。」
「心想唔會事成」
台下有歌迷大嗌Leon「靚仔」，他搞笑說：「靚仔冇用o架！我有個座右銘係唔好做最差嗰個就得，有時蠢蠢哋先最幸福。」因快到聖誕節及新年，黎明祝福歌迷時又說：「心想係唔會事成，因為淨係心諗係唔得，要用心同埋行動去做，唔理動作快定慢，快未必啱時機，都要睇運，但有行動就係好事。」個唱上Leon與歌迷互動玩你問我答，有男歌迷希望黎明能永遠唱歌給他聽，旁邊女士即搶咪說支持黎明：「如果有時限嘅話，我會揀一萬年。」黎明神回：「你哋放心，我會永遠活喺你永遠入面。」