小霸王「亂舞」利刀 楊尚友怒喝港孩
星級名廚楊尚友（Christian）為ViuTV真人騷煮食節目《煮吧！換咗我阿媽2》再任評判，節目初段出現驚險場面，小霸王手執利刀「亂咁舞」，多次幾乎誤傷評判還屢勸不聽，難怪Christian發火直斥對方未來10年都不應該揸刀！
與上輯不同，節目先由4隊進行淘汰賽，面對煮意粉或炒麵考驗，媽媽是廚藝高手還是地獄廚神即時無所遁形。3位星級名廚楊尚友（Christian）、張錦祥（Ricky）、蔡家富（Gabriel）繼續指點教路，抵死論盡4組港孩港媽，對話好笑又有骨：「你Keep住落水，睇怕我哋今晚都收唔到工！」怪獸阿媽零預備，拿錯星廚食譜中沒有的蒜頭，Ricky即寸爆說：「呢啲咪智慧囉！」小霸王港孩懶叻稱跟食譜煮會更好味，Gabriel忍不住反駁：「你忠於原著嘛，咁又亂加蒜頭？」怪獸阿媽一腳踢，但堅持只讓小霸王切蒜頭。
突然驚險場面出現，小霸王「亂舞」利刀，幸好Ricky跟Christian反應夠快，否則隨時血濺廚房！不過小霸王則笑笑口屢勸不聽，激得Christian大罵：「未來10年佢都唔應該揸刀！」而最離奇的是怪獸阿媽完成菜式後竟讚小霸王做得好，星廚們再次寸爆：「你個仔咩都冇做過，你都Keep住話佢好嘢，你真係好嘢！」
交換阿媽互相嫌棄
怪獸阿媽和小霸王險勝忘記試味的隊伍，與另外兩隊可以繼續參與挑戰出埠特訓。小霸王未能前往心儀的日本，即示範秒速爆喊，還揚言想退出比賽，然後就埋首打機。怪獸阿媽忍氣吞聲道：「唔該你可唔可以停一陣先？我想同你新媽媽交換電話。」在外地期間，3對親子組合勁有火花，產生不一樣的化學作用。工作人員提醒小霸王不要用煙花整蠱人，他就拿着煙花去燒新媽媽（瑤媽媽），身為全職女強人的瑤媽媽都受不了：「點解我哋日日喺度鬧交？」不過節目承接上輯亦有溫情一面，揭露媽媽心中之苦，兩位媽媽都坦承有時未能好好照顧小朋友，催淚對白引人共鳴。
出埠集訓激鬥廚藝
《煮吧！換咗我阿媽2》透過親子合作進行一系列烹飪比賽，以廚藝增進親子感情，並通過交換媽媽，讓家長和孩子換位看清問題。節目內，3位星級名廚楊尚友、張錦祥、蔡家富擔任評判，先了解3組家庭的起居生活及煮食習慣，再給予意見。3組家庭互換媽媽後，會分別遠赴釜山、北海道與曼谷特訓，體驗當地飲食文化。透過數日相處，增進孩子與「新媽媽」的感情與合作性。最後，3組新家庭會回港進行終極比賽，爭奪冠軍寶座。阿媽贏，仔女就輸；仔女贏，阿媽就輸。身份逆轉，勝負當前，若仔女只顧贏輸，阿媽是否只會讓賽？
《煮吧！換咗我阿媽2》
播出頻道︰ViuTV99台
播出時間︰2017年12月25日起（逢星期一至五）晚上10時至10時30分
文：音樂組