周嘉莉人細膽大 童年封波霸
藝人周嘉莉在幕前形象斯文淡定，原來性格活潑好動，自小已四處跑跑跳跳，在筲箕灣長大的她舊地重遊，回憶點滴在心頭。她更分享難忘初戀回憶，自爆以前天天到協青社打排球，只為見心儀男士一面，可惜有緣無分。但相隔10年後，二人重遇，再見亦是朋友，一切盡在不言中！
流連遊樂場 捉迷藏
嘉莉自爆童年在筲箕灣居住時非常活潑，經常在東大街街市上面的遊樂場流連，笑言在該處與朋友玩捉迷藏就是她最寶貴的童年回憶。她表示兒時的玩樂就是這樣簡單：「小學放學時日日都會上去玩，最鍾意同啲朋友捉迷藏，我哋試過10個人匿埋喺條滑梯，其實細個咁樣匿嚟匿去，已經覺得好開心好好玩。」嘉莉自言小時候相當大膽，竟爬上天台欄杆，更自誇當年身手靈活，一下子已經爬上去。多年後再遊此地，嘉莉決意再施展其攀爬功夫，但終要多番嘗試下才能爬上去，場面搞笑。
遊樂場旁的乒乓球桌亦令嘉莉的兒時回憶湧現，她憶述：「我以前經常同朋友嚟打乒乓波，由於當時冇咩女仔鍾意打，成個校隊得我一個女仔，所以我點都係小學乒乓球裏面嘅冠軍，啲人仲封我為『乒乓波霸』！」嘉莉又指朋友每次提起此稱號都會揶揄她，令她哭笑不得。
打排球 為見心上人
除了遊樂場外，嘉莉對協青社同樣充滿回憶，重遊舊地的她再踏上這條長樓梯，猶如返回中學時期，腦海湧現不少舊日的片段。雖然景物依舊，人面全非，但最令她緬懷的是其初戀回憶：「由細到大我都好鍾意做運動，中學放學就會嚟呢度打排球，仲喺呢度搵到我嘅初戀，佢就喺度跳街舞，當時我日日嚟打波就係為咗見佢一面。」可惜這段戀情最終並沒開花結果，嘉莉感慨地指雖然二人有交換電話，不過並沒有發展，只是維持朋友關係。10年後二人再度相遇，嘉莉指再見已不是昔日的感覺，反而視對方為熟悉的老朋友，舊事回憶則永遠藏於心底。
貪吃 濃厚人情味
自小已十分為食的嘉莉，不但表示最愛到附近有名的太安樓掃街，更化身導遊，帶大家吃盡美食如海南雞飯、格仔餅、雞蛋仔等。她大讚除了價錢相宜外， 還充滿人情味：「我特別鍾情呢檔賣腸仔嘅檔口，我幫襯咗10年，佢哋一代傳一代 ，我以前就係幫襯佢Daddy，依家就到幫襯佢囝囝，咁多年價錢都冇咩變，就係希望啲街坊可以繼續食到平嘢，所以我每次返嚟呢度都一定要食呢3蚊腸仔。」面對物價通脹，但此處的價錢依然相宜，難怪嘉莉說：「我就係鍾意呢度咁有人情味，咁多年都堅守原則，依家出面好少有。」
後記：
雖然已搬離筲箕灣居住，但嘉莉今次重遊舊地，往事湧現心頭。從其一言一語，亦能感受到她如斯懷念昔日的好時光。時間會為往事加上濾鏡，所以回憶總是美好的，即使多年後，亦令人難以忘懷。
文：陳曉柔
攝：吳文聰
服裝：JA2K
髮型：Match @HAIR Salon