歡迎陳凱琳爭飯碗 鄭嘉穎冧笑：搶多啲呀！

藝人鄭嘉穎、曹敏莉、陳展鵬、鄧萃雯等前晚出席頒獎活動，當中鄭嘉穎的女友陳凱琳近日成為新一輯炸雞廣告代言人，曾是代言人的嘉穎對於被「搶飯碗」笑說：「搶多啲呀，一個做完到第二個。」他亦不介意情侶檔拍廣告，但貴精不貴多。

嘉穎近日忙於與古天樂及張智霖拍新片，日內煞科後會去旅行，他說：「今年拍咗三部電影、一個音樂劇同一個真人騷，係時候抖抖。（同陳凱琳去旅行？）可能啦，佢下半年仲忙過我。（旅行結婚？）今次就唔會。（下次會？）唔知o架，呢啲假設性問題好難答，未必冇機會嘅，但係今次一定唔會，有再話你聽。」

鄧萃雯自封「一姐」

王祖藍旗下藝人鄧萃雯將離巢自組工作室，她說：「係呀，學吓嘢，依家最緊要請個得力助手。（有咩工作想做？）同祖藍合作已經同佢講，幫我唔係筍嘢，我現階段唔係等爆紅機會，又唔係需要被認同，亦唔係要好多錢，所以唔係有錢我就會接，想做有影響力嘅演藝工作者。（工作室喺王祖藍旗下﹖）唔會，係獨立工作室，佢公司太多人，我處理唔到同太多人溝通，不如精簡啲。（同祖藍合作有冇問題？）冇問題，佢好nice，佢話唔使簽約，試吓合作年半先，我係『一姐』因為合作得最耐，哈哈。」

此外，陳展鵬最近於將軍澳購入價值過千萬的住宅送給媽媽：「方便返去飲湯嘛。（儲錢買樓結婚？）鍾意租多啲，有咩事可以搵業主整。」今年無綫「視帝」之爭，似乎暫時以王浩信呼聲最高，展鵬說：「自己一向平常心，仲有蕭正楠同馬國明呢。」

文：影視組