胡鴻鈞吊威吔墮地傷頭送院

Hubert目前仍然留醫，其唱片公司老闆何哲圖和無綫高層樂易玲都有前往探望。何哲圖昨午約4時45分離開醫院，問到Hubert可有暈眩或休克症狀？他說：「佢有少少暈，所以要細心檢查，包括做腦掃描，屋企人都睇住佢。（有冇影響活動能力？）冇，係有啲攰，仲有啲暈，所以醫生想再細心啲檢查。（有冇嘔？）冇，都冇表面傷痕。（幾時出院？）未知，依家好好多，係要瞓覺同休息。」

胃口好食牛腩麵

問到可有追查意外成因，又有否影響拍攝進度？何哲圖表示要問劇組，並指《降》劇監製很關心Hubert的情況，至於會否影響到其他工作？他指近月只安排Hubert專心拍劇。問到是否被下「封口令」封鎖受傷消息？他說：「唔係，只係想畀佢休息吓。」

而樂易玲昨晚探病後指Hubert胃口佳：「佢由伊利沙伯醫院轉去私家醫院，所以全部重新照多次，搵埋專科醫生睇佢，連耳仔都照埋，怕佢耳水不平衡，結果乜都正常，但Hubert仍然話暈同攰，所以等佢休息耐啲先出院。佢留院期間好好胃口，有食牛腩魚蛋麵，媽媽都有煲湯畀佢飲。」至於無綫副總經理（節目及製作）杜之克昨日回覆本報：「今次唔係咩嚴重事件，唔會當宣傳咁樣做，亦冇所謂嘅封鎖消息。」並承認《降》劇拍攝進度受影響。

而胡鴻鈞昨晚在社交網報平安，發文表示：「多謝大家和傳媒朋友的關心，抱歉未能一一回覆你們的來電和訊息，拍劇時發生了意外，感恩這星期康復進度良好。現階段先要繼續好好休息，希望能盡快回到工作崗位，為受到影響的所有工作單位說聲不好意思。再次謝謝各位的關心和慰問。」相中見他雖然躺在病床，但精神不錯，不少粉絲留言祝他早日康復。