許靖韻愛犬見人傾電話就「吠」

不少人都會因為有鼻敏感而拒絕養寵物，但藝人許靖韻（Angela）並沒因此放棄養寵物，更在大學時期收養了貴婦狗阿Bu。在收養前做了不少資料搜集的Angela笑言：「我一路都覺得依家呢隻狗係好堅強同埋好勁，因為喺帶阿Bu返嚟嗰時只有兩個月大，而且係有狗瘟嘅，但最後都可以好健康咁生存到。」Angela亦表示最初家人對狗存有偏見，而且十分反對：「不過依家我阿媽同佢最friend，每晚都會同佢食消夜，仲畀我發現佢哋會一齊睇電視同傾偈，而且我同我細妹每一晚都會同佢一齊瞓，屋企好似多咗個新成員，多咗個女咁。」Angela更指阿Bu十分有趣：「佢係唔畀人傾電話，如果我或者我阿媽傾電話呢，佢會不停吠。雖然我成日都帶佢落街，去見其他狗，但係見到其他狗嘅時候，佢都係會走佬，而一見到人，佢就會好開心。」