李幸倪下一站…紅館

Gin Lee於2010年以馬來西亞歌手身份來港「踢館」參加無綫歌唱節目《超級巨聲2》，憑實力唱功獲香港多間唱片公司招手，可惜簽約後未見起色，直至2014年轉投環球唱片即取代當年被傳「扭計」的吳雨霏「一姐」地位，環球亦為她打造多首Hit歌。但人氣飆升的Gin Lee受訪時驚爆昔日隻身來港捱貴租的辛酸史，直言收入微薄搞到不敢出街，亦擔心租金問題想過「走佬」，幸獲好友出手相助。成功渡過難關的Gin Lee去年終捱出頭首嘗女歌手金獎，她表示去年非常精彩及充實，問到是否對獎項看得很淡？她說：「攞女歌手獎係好開心，新人嗰時曾經好想攞女歌手獎，作為歌手係好大肯定，努力咁多年終於有人睇到同肯定自己嘅努力。」

唔急嫁 做女強人靠自己

Gin Lee將於今年8月踏入30歲，向來是緋聞絕緣體的她坦言不心急找另一半，相信緣分到時擋也擋不住：「會嚟(口架)喇，要相信有就有。」問到多年來都沒有追求者？Gin Lee說：「個個都以為做歌手好多人追，大家錯晒，啲男仔會覺得佢會唔會好難接觸、相處。（唔好咁Cool？）識我嘅人知我幾搞笑，我相信緣分。」由於她已來港七年，問到是否太揀擇而失去拍拖機會？她表示：「身邊係有好多男性朋友，但冇進一步，係好朋友關係會舒服啲。（曖昧關係？）需要天時、地利、人和，唔係想就有。」

Gin Lee表示現時的目標是開大型演唱會。	來港參加《超級巨聲2》時，Gin Lee獲杜麗莎大讚很有實力和潛質。	隻身來港的Gin Lee遇到不快及難題會與女友人傾訴，包括AGA。

Gin Lee坦承女士青春有限：「拍拖係要，唔同階段做唔同嘢，結婚、拍拖都可以繼續唱歌。」隻身來港發展的她透露認識不少知心女友，每遇到不快及難題必與她們傾訴：「女仔朋友好多。（呢個年代接受同性戀？）係呀，冇所謂，OK啦，我又唔係好急同好恨，都幾隨心。」記者提議她搵富二代拍拖，Gin Lee即說：「我似咁嘅人咩？我想做個有能力同本事嘅女人，唔係話富二代唔好，都有好多富二代朋友，佢哋都有本事，我覺得女人應該有自己賺錢能力，同埋不停增值自己，唔可以全靠另一半。」

Gin Lee和父母及姐姐感情要好。	捱過低潮的Gin Lee笑言現在可以豪食瑤柱炒飯。	Gin Lee去年橫掃三大頒獎禮兼首奪女歌手金獎。

想開騷 賣飛真實過攞獎

近年唱片市道低迷，可謂出一隻蝕一隻，身為單棲歌手的Gin Lee說：「賺到嘅時候就要儲，唔可以話賺唔到錢，但比起以前難好多，曾經同前輩傾偈，佢話八、九十年代賣幾十萬隻係好少，我就話好可惜冇經歷過。」問到現時生活是否過得去？Gin Lee指現時很好：「加入新唱片公司唔使再憂生活上嘅嘢，可以專心工作。」並澄清從未住過劏房，更豪氣地說：「依家仲養得起兩隻貓。（好彩當日冇走佬？）當時真係無路可退，會選擇返屋企，捱咗大半年。」記者指她不需再捱杯麵？她哈哈大笑說：「依家可以食炒飯，加瑤柱。」

苦盡甘來的Gin Lee以「必經之路」形容低潮期：「面對困境時都有掙扎，點解要咁辛苦，為咩堅持？係咪堅持錯咗呢？但去到一個階段我就同自己講，有邊個追求夢想唔係要經歷呢啲。（夠硬頸？）辛苦經歷令我喺短時間長大同明白好多嘢。」她表示現時的目標不放於獎項上：「想開個大型演唱會。（紅館？）目標之一，飛賣得好係最真實嘅回報，人哋肯出錢買張飛睇，係欣賞你，覺得值得先入場去睇，呢啲嘢更加真實過攞獎。」

孝順女 早已為父母置業

與家人感情要好的Gin Lee，每次出席大型活動均獲雙親由馬來西亞來港捧場，並透露父母非常緊張其報道，儼如超級歌迷般會為她剪報：「佢哋喺馬來西亞每日起身第一件事係睇所有關於我嘅資訊，會幫我做剪報，上網睇MV同留言，佢哋睇網上留言多過我同好上心。」Gin Lee坦言來港時因收入微薄兼入不敷支，一度停畀家用，隨即自爆早已在馬來西亞置業：「我剛嚟香港時買咗層樓畀父母退休住。（咁有錢？）唔係好貴，唔夠一百萬港幣，其實我幾獨立，讀大學時係半工讀，儲錢交學費仲可以畀家用同供樓。」她又自責當日因財困要由家人幫手供樓：「去到自己有困難畀唔到，就覺得點解自己咁冇用，因為細個已經唔靠屋企人，去到自己有本事同能力照顧佢哋時，又發現自己都搞唔掂，好大壓力，自覺係負累。」問到父母見她現時生活安穩是否感安心？她說：「佢哋一直都擔心我，知我唔開心會收埋，同埋我只會報喜不報憂，我諗佢哋依家安心啲，上年開始見我有成績，有好多新機會。」

文：音樂組

攝：張福宏

髮型：Eve Chiu @ Queen's Private i Salon

化妝：Andy @ ndnco

服裝：H & M