林家棟求變脫出去
林家棟憑《娛樂插班生》模仿張學友而廣為人識。在圈中拚搏多年的他，憑監製電影《打擂台》橫掃多個電影獎項，令事業創上高峰。他認為要在娛樂圈生存，必須不斷求變。由喜劇演員、實力演員再做到幕後的家棟，目的是不甘心被指只懂做諧星。他於新片與陳法拉合作演出多場激烈床戲，破天荒首度露股人前獻出第一次。
不甘只當諧星
家棟憑無綫搞笑劇《娛樂插班生》成名，他扮張學友維肖維妙，盡顯其喜劇細胞。不過他不甘只當諧星，希望多演不同類型角色，以實力證明自己可以演任何類型角色。
我1988年參加無綫電視藝員訓練班第十五期入行，之後幾年我出現過迷惘期。當年同期同學有黃德斌、雷宇揚、劉錫明等，佢哋個個都型，我係全班最「中庸」一個。畢業後，佢哋個個條路都行得順過我。雖然我係有劇拍，但往往都係拍一場戲就收工，我都有反問自己點解又冇我份？當時都聽到身邊好多人嘅負面嘅說話。最深刻聽過「你使乜化妝吖！見鬼到你咩！望鬼到你咩！」我又試過拍完外景去完洗手間先上廠車離開，點知一上車又被人問候！呢個時候就睇你自己夠唔夠堅定繼續去做演員。我開始搵自己嘅存在價值，不斷諗點樣可以再發展得更好。直到1990年綜藝目《笑星救地球》，其實我有參與過，可能大家只係記得胡大為、廖偉雄同細龜，但我都多謝當年監製畀過呢個機會我，被人知道我係識搞笑。直到1995年我憑《娛樂插班生》蔡君夏一角扮張學友開始被大眾認識。但就因為太識搞笑，搞到戲劇部唔敢用我拍劇，我知道我要變。
尺度超乎想像
一直求變的家棟，突然被導演要求拍激烈床戲亦冇扭計。雖然對手是「女神」陳法拉，但他笑言不值得「驕傲」，更謂：「可能佢覺得有收穫過我喎。」
好多人話我近年有心轉型棄用搞笑用實力演技示人，我承認我係想試多啲嘢，唔想被人話我剩係識搞笑。曾經有人講我剩係識搞笑，搞到我好唔忿氣，我知我要不停地轉不停去試。我好羨慕外地演員發展空間好大，但香港就好易被定型，你演出過一次係咁嘅，搵你拍戲嘅人就永遠要求你做番之前一套。你當我貪心啲，我覺得唔係一個最理想嘅手法。最近我最開心可以參與李碧華系列作品《奇幻夜》由陳嘉上執導嘅單元，戲入面我同法拉首度合作，同佢都有大膽嘅情慾戲，尺度超越大家想像。外界一定以為呢部係三級片，其實成件事係我埋位時，導演陳嘉上問可唔可以咁拍，先前只知有接吻戲，都估唔到最後出嚟係咁激，亦估唔到陳法拉又肯喎！其實部戲係講佔有欲，所以拍起嚟先有需要咁激。如果你問我，我會比喻呢部係一部赤裸頗激嘅動作片，拍攝嗰幾日嘅情慾我覺得好奔放。戲入面我仲要除褲，除到連條褲自己都見唔到，基本上係我喺銀幕上第一次露股演出。當時第一個反應係：「吓！第一次咁就又冇咗？」好在一向有keep開身形，我身段係冇問題嘅。好多人羨慕我嘅對手係陳法拉，但我又咁諗，成件事可能佢覺得有收穫過我喎，哈哈！
向導演路出發
雖然要兼顧幕前幕後工作，但家棟毫無怨言，反而享受忙碌工作所帶來的成功感。家棟監製的電影《打擂台》獲獎無數，但他從未想過放棄幕前演出，更有意做導演，做一個全能電影人。
2010年我監製部電影《打擂台》總算有成績，喺第三十屆香港電影金像獎拎到「最佳電影」等四個大獎，同第十七屆香港電影評論學會大獎「最佳電影」，又參加過多個影展。呢套戲真係畀咗好多嘢我，開到我真正要嘅路。過往好多電影為咗市場而放低香港觀眾，我希望做番啲嘢同香港觀眾拉近距離。之後我都有不同計劃，做電影監製之餘亦會做演員，唔想捨棄其中一樣。有人問我會唔會做導演，我相信將來一定會有呢個機會。呢幾年我一定會幕前幕後同時發展，有人叫我唔好再做演員專心幕後，我當時仲笑問自己乜真係咁冇出路咩？我自問可以兼容嘅。《打》片有好成績，好多人問我怕唔怕之後條路會更難行，我真係冇諗過。我喺杜琪峯身上學到好多嘢，佢拍電影好多題材，唔會考慮市場，只會從劇本出發，就係咁簡單。
幸運屢遇伯樂
娛樂圈定律，有實力未必成功，想要闖出一番事業，必須配合天時、地利、人和。家棟慶幸人生中屢遇伯樂，若沒有人賞識提攜，就算如何努力亦是枉然。
我真係好好彩，萬梓良、監製李艷芳、曾勵珍畀好多機會我。最記得1994年我有機會同周潤發合演舞台劇《花心大丈夫》，我聽聞當年曾勵珍睇完我演出後，就起用我拍《娛樂插班生》，就係咁我成功入屋。至於萬梓良，當年我同佢合作拍劇，劇中我同佢係要連戲，我同佢講唔好意思我想出去演舞台劇，佢二話不說叫人幫我再度期，放我出去同周潤發合作。所以係萬梓良令我有呢個機會，亦係咁得到曾勵珍嘅賞識，呢個係一個緣分。
口述：林家棟
筆錄：影視組
場地：Richcoin Company Limited
化妝、髮型：Jessica Yuen @ Oasis Studio