糖妹「偷食」半粒鐘搞掂
歌手糖妹搬離深水埗「娘家」後自立生活，不過想食住家飯亦非難事。日前她就拍片教粉絲炮製「零失敗」的韓式炆牛仔骨，每當夜深又想獨自「偷食」，就有啖好食！
這道菜製作方法簡單，糖妹教路先將牛仔骨解凍及浸水去除血水味，再用廚房紙吸走多餘水分，之後加入韓式烤醬及半個切粒洋葱，再封保鮮紙放雪櫃醃製一晚。烹煮時先將蒜頭及洋葱爆香，再加入切粒冬菇、紅蘿蔔、半個洋葱及牛仔骨，全部落鑊加水冚蓋，開細火炆煮30分鐘即大功告成！問到味道如何？糖妹大讚：「睇片見到我望住碟牛仔骨雙眼發光、狼吞虎嚥咁就知超美味啦！呢味餸最啱送飯！」