最後0.2秒單挑贏大帝基爾絕殺灰熊滅火

基爾絕殺滅火！灰熊尋日喺主場憑領袖基爾擺脫「大帝」勒邦占士嘅嚴防，在完場前0.2秒射入跳投，以97比95絕殺熱火，令熱火輸掉今季第五場常規賽。另一方面，今季打出驚喜嘅黃蜂為增強爭勝本錢，尋日與速龍達成一項五人交易，老將史杜積高域會過檔速龍，而黃蜂則獲得射手積克。

由於韋迪受傷，熱火尋日只能以「兩巨頭」作客灰熊，熱火本以為可以將球賽帶入加時，皆因賽事剩餘5.5秒時，「大帝」一記入樽助球隊追成95平手。殊不知灰熊喺最後一個攻勢中，基爾單挑勒邦占士得手，佢帶向右邊在最後0.2秒時射出跳投，成功絕殺熱火，贏97比95。

灰熊前鋒蘭度夫賽後大讚基爾具級數，要知道能夠喺「大帝」面前絕殺，確實並非易事，而今場射入29分及交出11次助攻嘅占士，賽後就唔肯認衰，話自己已經盡全力防守基爾：「如果佢射唔入嘅話，就係一記出色嘅防守。」今場已經係熱火今季第五次輸波，難怪愈來愈多人質疑「超級三巨頭」冇料到。

另方面，黃蜂為了增強實力挽留「蜂王」基斯保羅，尋日與速龍作出一單牽涉五名球員嘅轉會交易，黃蜂送出貴價老將史杜積高域及比歷斯，以換入積克、馬古斯賓士及大衞安達臣。據悉積克與基斯保羅分屬老友，所以今次交易多少有取悅「蜂王」歡心嘅成分。

溜馬 86:90 魔術

山貓 123:105 太陽

鷹隊 93:98 小牛

灰熊 97:95 熱火

公鹿 81:82 雷霆

馬刺 116:92 騎士

金塊 107:103 籃網

拓荒者 94:103 爵士

快艇 115:124 紐約人

註：前者主場

最後0.2秒單挑贏大帝 基爾絕殺灰熊滅火