政情：老撾奧委會金盃贈Tim霍
港協暨奧委會主席霍震霆（Timothy）講過自己一日廿四小時唔夠用，除咗忙於打理霍家生意外，喺體育界工作方面都要花大量時間。無花無假，Tim霍尋日就喺香港會接待幾名來自老撾嘅體育界代表，包括老撾奧委會主席Dr Phoutong Seng-Akhom，雙方共進午餐，交流舉辦體育賽事嘅心得。
Tim霍話，香港去年成功舉辦東亞運動會，而老撾同樣喺去年舉辦第廿五屆南亞運動會，由於中國喺比賽前全力支持老撾興建比賽場館，所以Seng-Akhom上星期到北京拜訪國家體育總局局長兼中國奧委會主席劉鵬，答謝中國嘅支持。Seng-Akhom去完北京，順道來港深望Tim霍。
Seng-Akhom一場來到，Tim霍就邀請佢到香港會食飯，Seng-Akhom亦禮尚往來，送贈一座寫上代表老撾奧委會及老撾市民心意嘅金盃畀Tim霍留念，金盃好大座，唔知仲以為Tim霍贏咗體育比賽冠軍。Tim霍年中收收埋埋唔少呢類紀念品，唔知佢點樣處置呢？Tim霍笑笑口話：「咪放喺銅鑼灣奧運大樓囉！」