相信熟悉日本AV行情嘅朋友，一定會聽過「妮娜計劃」（Project Nina），事關成個2010年裏面都不停炒作，呢個計劃由兩間公司負責，話要打造一個可以改變日本AV界嘅女優典範，而呢位新人啱啱推出首套作品之後，馬上又有新搞作，要出唱片做歌星！
呢位新人妮娜，係由日本AV界中最會製造話題嘅SOD Create公司，同前人氣網站活力門（Livedoor）大老闆、有商界鬼才之稱嘅堀江貴文聯手打造嘅重頭計劃，堀江貴文有感於家陣嘅AV不足以滿足觀眾，於是揚言打造一個AV界嘅「全方位新星」，開創業界新時代。起初好多人都唔睇好，以為佢哋吹水唔抹嘴，但當新人妮娜曝光後，確實馬上引起全國哄動，首套作品一推出，第一個星期就殺入銷售榜頭20位之內，比起好多新人，吸金能力真係強好幾百倍，同時亦都證明堀江貴文嘅策劃十分成功。但要妮娜成為炙手可熱嘅巨星，似乎仲有一段距離，於是堀江貴文同SOD公司一於打鐵趁熱，決定安排喺10月6日推出首張唱片。
好少AV女優剛發完第一套作品，連第二套作品係乜、幾時出街都未知，就踩過界出唱片，真係唔到你唔佩服妮娜公司嘅魄力同膽識。今次妮娜嘅大碟，收錄兩隻歌，唱片叫做《PRISONER》，售價一千日元，圍起成百蚊港紙，同早前人氣女優春咲Azumi出嘅同一價錢，意思係堀江貴文睇好妮娜，有吉川嘅人氣同實力。而且據公司安排，妮娜仲會搞好多簽名會，同準備首個個人演唱會添，真係當佢係巨星咁宣傳，期間仲會上電視同電台做節目，遲吓話唔定仲會拍埋電視同電影！反觀娜妮樣子都算唔錯，但唔係十分有驚喜，身材普普通通，身高更係標準日本妹嘅尺寸，當佢巨星咁嚟力捧，最後能否成功，相信大家真係要密切留意呀！
撰文：小德