邊爐子文身肥肉厚，平時最鍾意食嘢，不過亞運媒體村個食堂就認真唔掂，我畀佢四個字：大而無當，雖然比一個十一人足球場仲大，但食物選擇就非常之少，每次個餐仲要收五十大元人仔，咁搞法自然日日拍烏蠅。有關方面近日終於從善如流，將價錢大幅減到十皮有交易，咁先至有番啲生意！
正所謂辛苦搵嚟自在食，記者為採訪亞運頻頻撲撲，梗係想好好醫肚，但個食堂來來去去都係提供啲炒飯、炒麵，質素唔係普通而係難食，肉又韌飯又乾，收咁貴即係趕客啫，大家冇計惟有唔幫襯，大大個食堂幾乎全部係吉位。
有見及此，有關方面即時補鑊，依家只收二折價錢，計過度過都算抵嘅，所以就出現番人山人海嘅場面。依家記者食飯，都大叫「Samantha」，點解？「十蚊飯」吖嘛，但我就鍾意另一個名「頹飯」多啲，夾硬食唔好食嘅平飯，又點會唔「頹」先得o架？