狀元對碰羅斯K.O.禾爾
【本報綜合報道】新秀狀元新不如舊！今季狀元巫師新星約翰禾爾，昨天與08年狀元公牛主力戴歷羅斯正面交鋒，結果羅斯盡顯大哥風範，引領公牛主場以103比96擊敗巫師，可憐禾爾輸波又輸人，誤傷隊友易建聯之餘，自己亦扭傷左腳！
大學時期同樣師承名帥卡利柏尼，羅斯與禾爾兩代控衞的背景似到十足十，但級數上有明顯分野！羅斯甫開賽便瘋狂剷籃，全場貢獻24分、8次助攻、4個籃板、2次偷波及1次封阻的全能數據，成為公牛贏波最大功臣。反觀只有16分進帳的禾爾則黯然失色，第3節更意外撞到隊友易建聯右膝，及後自己又扭傷左腳，要戴保護鞋套一拐一拐離場。
易建聯受創微博報平安
一場傷兩件，加上祖殊侯活正在養傷，難怪巫師教練桑達斯都自嘲球隊做「醫院」。連同一傷再傷的火箭中鋒姚明，中國雙星一周內連環打柴，不過「阿聯」昨日在微博叫球迷毋須擔心，因為傷勢不算嚴重。
賽果放送
籃網 90:91 魔術
山貓 95:96 爵士
熱火 109:100 速龍
騎士 85:99 溜馬
公牛 103:96 巫師
黃蜂 107:87 拓荒者
灰熊 110:116 ★塞爾特人
馬刺 116:93 76人
公鹿 79:72 勇士
★為加時（前者主場）