畢生宏願 飛越波神 高比6 Rings恨到發燒！

自從米高佐敦登上今年大熱遊戲《NBA 2K11》封面後，再度成為NBA風頭人物，傳媒亦難免再拿他與高比拜仁及勒邦占士等現役「最佳」比較。不過「波神」就似乎唔多放手執五枚冠軍指環嘅高比仔在眼內，早前受訪時更語出驚人：「若果單計後衞的話，我想他已打入史上前十。」此話一出難免令人覺得佐敦有點明褒暗貶，畢竟高比仔除奪冠無數之外，亦拿過常規賽及總決賽MVP，還有累積得分排在史上十二，如此顯赫成就卻僅入後衞前十？

佐敦明踩激起好勝心

雖然高比日前已替佐敦解圍，認為佢並冇侮辱之意，但言論無疑會激起好勝心，令其更想超越前輩。縱使口裏不認，但高比仔性格好勝，由第一日加入NBA開始，與「波神」比併心態從未息止，年前有記者問他最想與哪位球員one on one，他毫不猶豫便答︰Michael Jordan。而取得第六冠追平佐敦，甚至第七冠飛越昔日偶像……於高比而言，係最有效拋開「佐敦夢魘」嘅方法。

羅致多名具分量新兵

今季湖人除要面對來勢洶洶嘅新勁敵熱火之外，最大考驗其實係球隊傷患問題。縱然高比在季前已經完成手術解決膝部舊患，但手術過後明顯未回復狀態，在季前賽上陣時間唔多，整體表現亦未達標準。此外，「雙塔」之一拜林同樣在抖暑期間動手術，現時仍在恢復當中，預計要十二月先能復出，湖人季初難免會受考驗。

幸好湖人今季加強了板櫈深度，羅致了兩大防守專家班尼斯及韋列夫，前者正好用以防守對方得分主力，後者就可以減輕「雙塔」在內線攻防重擔，而另一新兵布力克亦具一定得分能力，加上三分球頗為準繩，所以若湖人能夠健健康康嘅話，仍屬聯盟中最強大嘅球隊。