位於大嶼山嘅群育學校東灣莫羅瑞華學校擬遷往屯門，遭新址鄰近嘅屯門仁愛堂陳黃淑芳紀念中學反對，該中學曾去信要求立法會否決遷校建議。信中指群育學校取錄嘅包括會作出暴力及侵犯行為嘅學生，該校需要一個較遠離人口密集、避免引誘嘅環境，結果惹來批評，事後該中學亦就事件致歉。最近我哋收到風，原來仁愛堂陳黃淑芳紀念中學校監吳偉光，就係民建聯立法會漁農界議員何俊賢嘅舅父！
何俊賢係立法會教育事務委員會委員，究竟佢在群育學校搬遷事件中，立場會否受到舅父影響呢？而佢又有冇向立法會申報利益呢？何俊賢話，舅父有就事件同佢溝通，但係佢處理議會工作一向六親不認，舅父都知佢難做，亦冇向佢施壓。佢又話，群育學校事件主要視乎該黨點樣決定，如果佢嗰票並非關鍵，佢會選擇唔投票，亦會避免就事件發言，無謂惹人誤會，佢會視乎事態發展作最終決定喎。