參觀史丹福橋做「藍戰士」
到訪英倫集訓嘅香港車路士足球學校學員，經過連日觀光及欣賞英超賽事後，今日就會正式入營，到倫敦車路士學校受訓，而尋日佢哋就去到車路士主場史丹福橋球場參加觀光團，嘗試一下做「藍戰士」嘅感受！
基於多數學員都係首次參觀英超主場館，所以入場前都特別緊張。學員首先到史丹福橋內嘅記者室聽車路士導遊解說，據悉有歐聯賽事嘅話，足足多達三百位記者塞喺呢間記者室入面，而學員及後就逐一坐上記者室嘅講台上，體會一下當車路士隊長泰利及領隊安察洛堤嘅感受。
見識主客更衣室差天共地
參觀完記者室之後，佢哋就去到球員更衣室，首先入到一間細細嘅更衣室，原來係畀作客球隊所用，環境除咗狹窄之外，儲物櫃又細，就連戰術板都放在門後面，總之就要令客隊諸事不順為止。相反主隊更衣室就樣樣俱全，仲有按摩池畀球員鬆一鬆，所以香港學員見到都大表驚訝，原來主客隊可以有咁大分別。
睇完更衣室，學員就正式從出場通道，直往史丹福橋球場，一眾學員都表示球場內嘅草地非常之靚，同香港冇得比咁話，之後去埋車路士博物館，結束今次旅程。
法比加輝