【本報綜合報道】塞爾特人再奪東岸冠軍，老臣子皮雅斯成為塞軍英雄，不過同人唔同命，其昔日拍檔安東尼獲加就繼續潦倒，日前佢仲向法院提交申請破產，意味佢喺06年為熱火奪得嘅冠軍指環，亦將被拿來拍賣還債！
「綠衫軍」尚未組織「三巨頭」前，就係靠「孖寶」皮雅斯及安東尼獲加打江山，不過獲加在05至06球季轉投熱火，結果畀佢一矢中的，同奧尼爾及韋迪聯手奪得總冠軍。
可惜呀，奪冠後獲加表現下滑，及後更染上賭癮，先後欠下賭場一大筆債，加上佢前年已退出籃圈，冇晒收入根本無力償還，最終欠債達到一千二百七十萬美元，迫於無奈申請破產。因破產後，所有財產都會被凍結還債，當中包括其價值六千美元嘅冠軍指環，會以拍賣形式出售，唔少ＮＢＡ球員追逐一生嘅東西，獲加就係因為嗜賭而棄掉。