湖人明早Game 3再拆城
雖然衞冕總冠軍洛杉磯湖人，喺西岸決賽已經領先鳳凰城太陽二比○，晉級機會相當樂觀，不過一眾戰將依然未敢輕敵，「二打六」祖殊包維仲三更半夜落球場加操添！湖人連大後備態度都咁認真，睇怕識攻唔識守嘅鳳凰城都好難翻身，聽日於鳳凰城舉行嘅第三回合比賽，湖人有望再下一城！（有線體育台62及165台周一早上8時30分直播）
大後備自動半夜加操
邊個係祖殊包維？呢位大前鋒今季場均上陣時間唔夠十分鐘，平均得分僅2.7分，係名副其實嘅「路人甲」！但據洛杉磯傳媒爆料，祖殊包維喺Game1賽後去咗擦餐勁，半夜就自己一個返球場練射籃，鬼咁勤力。湖人助教鶴治知道祖殊包維咁有心，話唔埋聽日積遜教練會畀佢打多幾分鐘當獎勵。
湖人頭兩場合共攻入252分，命中率高達57.8%，以鳳凰城嘅鬆散防守真係好難抵擋加素同高比拜仁嘅進襲，喺主場輸多鑊勁絕對唔奇，湖人今場仲受讓，幾着數喎！