湖人七成功力打殘巫師
【本報綜合報道】湖人見完總統奧巴馬之後，昨日作客巫師只用七成功力便順利以103比89贏波，為今次華盛頓之旅畫上完美句號。湖人今場有中鋒拜林自上季總決賽後首度復出，但狀態明顯未完全回復。至於巫師就賠了夫人又折兵，易建聯在首節被阿堤斯撞傷右膝，今季第二度弄傷膝蓋。
拜林缺態復出冇貨交
自上季總決賽後一直養傷嘅拜林，事隔179日後終重返賽場，「小鯊魚」喺首節6分鐘時入替，由於休戰太耐，大為缺態下最終只出場17分鐘，射入7分、4個籃板球及2次封阻。不過拜林都唔係冇用處嘅，至少可讓疲兵加素得到較多時間休息，後者今場上陣31分鐘，今季第5次出場少於35分鐘。
巫師本身實力不及湖人，加上今場有兩主力約翰禾爾及巴特治因傷缺陣，打落明顯低幾班，「紫金兵團」在完結三節後，已取得22分領先優勢，故高比拜仁打完前三節已可提早收工，最終輕取巫師103比89，近六戰贏五場。僅上陣24分鐘嘅高比仔仍攻入全場最高24分，而奧當就奪得「雙雙」18分及10個籃板。
阿聯慘變「傷膝」青年
巫師教練桑達斯今場派易建聯正選登場，可惜阿聯僅開賽5分鐘就喺一次防守中被「惡人」阿堤斯撞傷右膝，要兩名隊友攙扶下提早離場。今次已經係阿聯今季第二度撞傷右膝，上一次傷出只係上月中作客公牛，而阿聯4年NBA生涯中，右膝已傷過5次咁多，希望今次手尾唔會太長。
巫師聽朝將會作客籃網，預計阿聯肯定要缺陣，球隊飽受傷兵困擾下，估計會再輸一仗。（有線165台及now 678周五早上8時直播）