柏加重創常規賽收咧
明早有場重頭戲騎士主場對馬刺，不過大家可能無緣睇到兩位球星柏加同勒邦占士，因為二人都有傷在身，其中以柏加傷勢較為嚴重，佢喺尋日對灰熊一戰勇戰受傷，可能會缺席餘下嘅常規賽。
昨日馬刺作客以一○二比九十二擊敗灰熊，但卻因此而付上沉重代價，控衞柏加右手不慎骨折，起碼要抖六星期，幸好其他隊友發揮水準，共有六人得分達雙位數，最終以十分之差擊敗灰熊。灰熊今場輸波後，主場已八連敗，但作客卻取得六連勝，呢種主弱客強嘅特性，連馬刺教練普波維治都摸不着頭腦，話執教生涯前所未見。
大帝缺陣騎士負公鹿
至於騎士昨日亦爆冷輸波，不敵公鹿八十五比九十二，主要原因係「大帝」勒邦占士受傷，今季首度缺陣。教練米克布朗表示：「勒邦占士扭傷右足踝，今場我決定畀佢休息，下場對馬刺出唔出得，視乎佢傷勢嘅進展。」不過，如果兩位星級球員聽朝都唔出得嘅話，呢場波嘅可觀性肯定大減！
■本報綜合報道