今仗南華攻勢一面倒，僅備戰三星期嘅大中全場處於劣勢，十八分鐘南華小將郭建邦突破越位，狂抽掛網先開紀錄，攻入今季聯賽首個入球，亦為南華大勝揭開序幕，完半場南華雷文快開罰球，卡里祖窄位射成二比○返入更衣室。

郭建邦都入兩球

換邊後初段大中一度有反擊機會，元洋及阿歷士近門施射均被近況大勇嘅門將何國泉救出，其後大中球員力弱，變成南華球員嘅表演時間，一眾攻擊球員努力爭取入球，不過新援雷文球運麻麻，一次近門頭槌頂中柱彈出，反觀卡里祖就順風順水，七十三分鐘接應黃展鴻傳中頂成三比○，三分鐘後李威廉妙傳郭建邦頂入成四比○埋齋。

補時階段大中守衞拿美被球證吹罰後發脾氣，遭判罰第二面黃牌被逐，來仗無緣倒戈戰傑志，亦係今季聯賽首張紅牌。今季聯賽實施「主客制」，昨日南華大球場主場有二千二百三十人入場，收入為七萬二千八百六十元，今季大球場減場租至約六萬多元，票房收入僅僅夠交租。

近17年最懸殊揭幕戰

聯賽揭幕戰傳統上都由去季冠、亞軍對壘，近年最懸殊比數為九二至九三年東方以五比○大破南華，今季足總以抽籤決定開咧戲碼，新升班嘅大中成為近十七年來輸得最轟烈嘅開鑼戰球隊。