政情：肥亨寄話青少：買樓唔使急

商務及經濟發展局前局長馬時亨（肥亨）尋日出席香港社區組織協會嘅基層兒童成長攝影展覽，並為「『跨代貧窮』面對面」講座擔任嘉賓，探討跨代貧窮及如何脫貧等問題。肥亨話明白現時年輕人生活難處，上車相當唔容易，但佢話自己都係三十九歲先置業，多謝太太馬王培琪冇「咿咿哦哦」埋怨佢。

香港樓價高企，基層難以置業，對於有人認為「男仔冇樓就唔嫁」，自細住喺板間房長大嘅肥亨坦言接受唔到呢種諗法，認為年輕人唔需要急於「有樓」，只要做好手上工作，錢便會隨之而來，到時到候自然會有置業機會。

講起童年時貧窮經歷，肥亨話細個餐餐只有豬油撈飯，最多間中加隻蛋，而佢十歲時已出來做兼職「挑褲腳」賺錢，「挑」一條褲收費一毫至二毫，儲夠三毫子就夠錢買一條紅衫魚返屋企加餸。另外學校每星期六派發麵粉，佢就會儲埋一次過用嚟煎薄罉食。