本文重點
今屆永倫獲得蔡芳裕、呂楚威、梁振雄及黃鎮煒這四名經驗豐富球星加盟，再加上原有嘅「星級陣容」，以豐厚戰力橫掃聯賽！不過，會長許業榮就透露來年組軍將以潛質新秀為主：「我哋有主力鍾馬飛正式退休，球隊要有新球員補入，所以簽咗安青射手葉嘉浩；另外，中鋒蔡芳裕亦已年屆三十五，故羅致飛鷹嘅蘇伊俊作後援。希望呢兩名二十出頭球員，可以喺球會磨練下有極大進步。」
蘇伊俊佐敦面前獻技
喺澳洲留學今年正式回流香港嘅蘇伊俊，曾喺年前米高佐敦訪港期間，於「波神」面前表現入樽，並被呢位超級球星封為「入樽王」，實力得到廣泛認同。蘇伊俊表示：「我會視此為新挑戰，雖然初期能夠搶得正選位置的機會不大，但我相信喺冠軍球隊做後備所學嘅嘢，總比喺護級戰打正選嚟得更多。」而喺中學年代有多次擊敗羅意庭經驗嘅葉嘉浩，加盟永倫後則有機會延續「羅意庭剋星」宿命。